«Ես 30 տարվա մեջ առնվազն 20-25 անգամ եղել եմ այս օրը Մելիք Ադամյան 1-ում, երբ Գալուստ Սահակյանն ու Պարույր Հայրիկյանը նախաձեռնում էին, որ մենք այս օրը նշեինք՝ որպես մեր պետության հիմնադրման կարեւոր փաստաթղթի օր: Իսկ այսօր ես եկել եմ շատ մտահոգ, տխուր, որովհետեւ այսօր թշնամին մեր սահմանից ներս է մտել: Ես այսօր տեսնում եմ մեր հայրենակիցների վառվող տները, թուրք-ադրբեջանական ավելի հզորացումն ու Հայաստանի թուլացումը: Դրա համար հայ ժողովուրդը՝ սփյուռքը, Արցախը պետք է միավորվեն, որ կարողանանք այս վիճակից դուրս գանք»,- այսօր լրագրողների հետ զրույցում ասաց սփյուռքի նախկին նախարար Հրանուշ Հակոբյանը:
Նա նշեց, որ սփյուռքի նախարարության փակվելուց հետո գրեթե չի հետեւում սփյուռքի հետ կապված աշխատանքներին. «Ես ինձ համար գիրք եմ գրում, նախարարության տասնամյակն եմ գրում, բոլոր հանդիպումները, որոնք համայնքներում ունեցել եմ, դրանք եմ ի մի բերում: Ես փորձում եմ եղած կառուցակարգերը, կապերը, հարաբերությունները, որոնք ստեղծվել են սփյուռք-հայրենիք համագործակցության արդյունքում թղթին հանձնել, որովհետեւ դրանք մեզ պետք են գալու: Սփյուռքը դա մեր գազն է, մեր նավթն է, եթե նրանք ուրախանում են կամ իրենց մարդ են զգում իրենց նավթով ու գազով, որը սահմանափակ է, ապա մեր ազգը, որ 10 մլն-անոց մտավորական մարդկանց գումար է, մերը անսպառ է՝ հայի միտքը, հայի խելքը»:
Ըստ Հրանուշ Հակոբյանի, եթե Ալիեւը ճիշտ է ու մենք 5 մլրդ-ի զենք ենք թողել, ուրեմն մենք պետք է 5 մլրդ-ի զենք գնենք, որ բանակն ուշքի բերենք, պաշտպանված սահմաններ ունենք. «Ամբողջ հայ ժողովուրդը պիտի աշխատի բանակի համար, բանակի գեներալների համար, սպայական կազմի, զինվորների համար…30 տարի Ադրբեջանը սարսափել է մեր բանակից, պետք է հասնենք նրան, որ նորից սարսափի»:
Հարցին՝ համեմատական կարո՞ղ եք տանել Գերագույն խորհրդի եւ այսօրվա խորհրդարանի կազմի միջեւ՝ Հրանուշ Հակոբյանը պատասխանեց. «6 անգամ լինելով պառլամենտի անդամ 22 տարի շարունակ, կարծում եմ, որ ամենահզոր, ամենաուժեղ, ամենաինտելեկտուալ պառլամենտը եղել է Գերագույն խորհուրդը՝ 90-95թթ-ին: Որովհետեւ այդտեղ եկել էին մարդիկ՝ հիմնականում կոմունիստներն ու ՀՀՇ-ն, որոնց նպատակը ազգային պետության կառուցումն էր: Հավատացեք, որ գրեթե չեմ նայում այսօրվա պառլամենտի գործունեությունը, հիմնականում կարդում եմ այն օրենքները, որովհետեւ պարտավոր եմ կարդալ, որ դասավանդման ժամանակ օգտագործեմ, բայց չեմ լսում: Աշխատում եմ քաղաքական դիսկուրսից հեռու մնալ, որովհետեւ շատ ծանր եմ տարել շատ բաներ, առողջական խնդիրներ եմ ունեցել։ Դրա համար փորձում եմ կենտրոնանալ ավելի շատ գիտական, ստեղծագործական աշխատանքի վրա:
Կարդացեք նաև
Հռիփսիմե ՋԵԲԵՋՅԱՆ
