Ինչպես արդեն տեղեկացրել ենք, Վայոց Ձորի Կեչուտ բնակավայրում Ադրբեջանի հարձակումից վնասվել է 7 տուն։
Նարինե Գեւորգյան
Տներից մեկի բնակիչ Նարինե Գևորգյանը հիշում է, որ լուրի մասին տեղեկացել է հարևաններից. «Ճիշտն ասած, մենք մոտ էինք, հա գնացել, հա եկել ենք։ Էնպես չի, որ մշտական մնացել ենք։ Մեզ, որ ասացին, խփել են ձեր տանը, եկանք տեսանք, որ չեն խփել, ընկել էր էնտեղ, օսկոլկից՝ էդ հարվածից շուշեն էր թափել։ Հա գնացինք, հա եկանք էլի, որ մեր երեխեն էլ էստեղ պայմանագրային է, էդպես ոնց որ անհանգիստ լինեինք, անընդհատ գնում գալիս էինք»։
Հիշում է, որ իր պայմանագրային զինծառայող որդին միանգամից հագնվեց գնաց զորամաս. «Փոքրն էլ փոքր երեխա է՝ 7 տարեկան, հլը ոչ մի բան չի իմանում։ Քնած էր, արթնացրինք հագցրինք գնացինք»։
Կարդացեք նաև
Իսկ նրա ամուսինը՝ Իշխան Ասատրյանը պատմում է, որ վնասվել են տան երկու պատուհանները. «Հենց նույն գիշերը հանել եմ բոլորին։ Արկերը, որ ընկան Ջերմուկում, ես հանել եմ, որովհետև սաղ խուճապի են մատնվել, դուրս էին գալիս, մենք էլ դուրս եկանք։ Էս էլ խփել են, տեսնենք ի՞նչ է լինում, թե չէ պատուհան կա»։
Հարցին, թե պատրաստվո՞ւմ է Կեչուտում մնալ, նա պատասխանեց. «Բա իմ հայրենիքն է, ո՞ւր գնամ։ Իմ տղան ծառայում ա, մյուսը էստեղ աշխատում ա, ես էստեղ ծնվել մեծացել եմ … կյանքում չեմ գնա հայրենիքից»։
Ամի ՉԻՉԱԿՅԱՆ
