ՀԱՊԿ Հավաքական անվտանգության խորհրդի նեղ կազմով նիստում 17 նախագիծ է ընդունվել, 2-ն ուղարկվել է վերանայման։ Այս մասին այսօր նիստի ավարտից հետո ասաց ՀՀ վարչապետ Նիկոլ Փաշինյանը։ Նա նաեւ տեղեկացրեց, որ ՀԱՊԿ նախագահությունը եկող տարի փոխանցվում է Բելառուսին։
Բելառուսի նախագահ Ալեքսանդր Լուկաշենկոն իր խոսքում ասաց՝ Բելառուսը ՀԱՊԿ-ի նախագահությունը ստանձնում է միջազգային հարաբերությունների համակարգային ճգնաժամի ընթացքում, ակնհայտ է աննախադեպ ռազմաքաղաքական իրավիճակի սրումը, Եվրասիական տարածաշրջանում։ Նրա խոսքով՝ արեւմտյան երկրները համառորեն փորձում են վերադառնալ միաբեւեռ աշխարհակարգին՝ պարտադրելով իրենց խաղերը։
Կարդացեք նաև
«Միջազգային իրավունքին փոխարինում է ուժի դիկտատուրան եւ պատժամիջոցների պրակտիկան՝ անհնազանդ երկրների նկատմամբ։ Միջազգային տարածաշրջանային անվտանգային ճարտարապետության ճգնաժամն անմիջականորեն անդրադառնում է նաեւ ՀԱՊԿ-ի վրա, որը ենթարկվում է բազմածրագրային մարտահրավերների ու սպառնալիքների ազդեցությանն ինչպես անդրազգային բնույթի, այնպես էլ միջպետական հակասությունների։ Սա ժամանակակից աշխարհաքաղաքական իրականություն է, որտեղ ստիպված է գոյատեւել ՀԱՊԿ-ը եւ որին պետք է ՀԱՊԿ-ն արձագանքի, ընդ որում, ինչպես ներքին, այնպես էլ արտաքին շրջանում»,-ասաց Լուկաշենկոն։
Եւ այս իրավիճակում, ինչպես ասաց Բելառուսի նախագահը, ՀԱՊԿ-ի նպատակներն են՝
ներքին դաշտում՝ ՀԱՊԿ անդամ երկրների համերաշխության բարձրացում, սա հիմնական նպատակն է, երկրների միջեւ լարվածության նվազեցում եւ հակասությունների կարգավորում, ՀԱՊԿ-ի ամրապնդման նպատակով՝ ՀԱՊԿ-ի պատասխանատվության գոտում անվտանգության ապահովում․«Սրա մասին շատ ենք խոսել, այն, ինչ քննարկել ենք, բարձրաձայնման ենթակա չէ, բայց առաջին անգամ նման անկեղծ ու բաց խոսակցություն եղավ։ Մի կետում, որը մենք երկար համաձայնեցնում էինք, մեր արտգործնախարարությունները, մեր հայ բարեկամները փոփոխություններ են առաջարկել, բայց մենք որոշել ենք չընդունել, չխորանալ։
Առաջին անգամ պայմանավորվեցինք, որ համաձայնության գալու կետեր կան, եւ ինչպես մենք հասկացանք, ներկայիս նախագահությունից, հայ-ադրբեջանական հակամարտությունը, եթե գործենք այնպես, ինչպես այսօր քննարկել ենք, այն կավարտվի եւ կկնքվի խաղաղության պայմանագիր։ Ես ոգեւորությամբ եմ այն ընդունում։ Նիկոլ Վովային լռում է, ուրեմն ինքը համաձայն է նրա հետ, ինչ նոր ասացի։ (Փաշինյանը գլխով դրական նշան արեց, Ն․Բ)»։
Լուկաշենկոն անդրադարձավ նաեւ այլ հակամարտություններին, մասնավորապես նշեց, որ առաջընթաց կա Ղրղըզստանի եւ Տաջիկստանի միջեւ հակամարտության լուծման հարցում։
Նելլի ԲԱԲԱՅԱՆ
