Այսօր Հրազդանի թիվ 11 դպրոցում անհայտ գազից ինքնազգացողության վատացմամբ հիվանդանոց տեղափոխված աշակերտները շնչառական որոշակի խնդիրներ ունեին: Այս մասին Aravot.am-ին հայտնեց Կոտայքի մարզպետարանի կրթության վարչության պետ Կարեն Հունանյանը. «Այցելել եմ հիվանդանոց, ծանր դեպքեր չունենք, բավականին լավ են, ունեն շնչառական որոշակի խնդիրներ, բայց ավելի շատ հուզվել էին»:
Նա ասաց, որ հակված չէ հանցագործության տարրեր տեսնել կատարվածի մեջ. «Երեխա է»: Ըստ Կարեն Հունանյանի՝ աշակերտները համադասարանցիներ չեն:
Դպրոցի տնօրենը մեր զանգերին չպատասխանեց:
Գոռ Աբրահամյանը՝ ֆեյսբուքյան էջից
Իսկ քննչական կոմիտեի խոսնակ Գոռ Աբրահամյանը ասաց, որ ահազանգից անմիջապես հետո նախաձեռնվել է քրեական վարույթ, քրեական օրենսգրքի 171 հոդվածի երկրորդ մասի հատկանիշներով, քննիչները մեկնել են իրենց նախնական անհետաձգելի քննչական գործողությունները կատարելու, դեռեւս վաղ է դեպքի հանգամանքների մասին նախնական տեղեկություն ասելը:
Կարդացեք նաև
ՀՀ առողջապահության նախարարությունը քիչ առաջ հաղորդեց․ «Հրազդանի բժշկական կենտրոն տեղափոխված բոլոր երեխաները, անհրաժեշտ բուժօգնություն ստանալուց հետո, դուրս են գրվել հիվանդանոցից»։
Արփինե ՍԻՄՈՆՅԱՆ
Գլխավոր լուսանկարը՝ Հրազդանի Վիլյամ Սարոյանի անվան N11 հիմնական դպրոցի ֆեյսբուքյան էջից
