Օրերս Սոս Սարգսյանի անվան Համազգային պետական թատրոնում կայացավ դրամատուրգ, թատերագետ Անուշ Ասլիբեկյանի «Մերսեդես» պիեսի բեմական երրորդ մեկնաբանության` թատերականացված ընթերցանության առաջնախաղը։ «Մերսեդեսը» 2012 թվականին դեռ արձակ էր, երկու տարի անց պիես դարձավ եւ մտավ թատերական աշխարհ։ Պիեսը ներկայացնում է 1948 թ. ներգաղթյալների մի ամբողջ սերնդի ճակատագիրն ու կյանքի դրաման Խորհրդային Հայաստանում:
Համազգային թատրոնի գեղարվեստական ղեկավար Նարինե Գրիգորյանը նշեց` թատերականացված ընթերցման ժամանակ, արհեստավարժ դերասանուհիների միջոցով, հանդիսատեսը կզգա նրանց հաղորդած մեծ էներգիան, պիեսի հոգեբանական խորությունը։
«Դերասանուհիներն ուղղակի հիացրեցին։ Տաթեւ Ղազարյանն ու Արմինե Անդրեասյանն այնքան պատկերավոր խոսք ունեին եւ խորը հոգեբանական մեկնաբանությամբ ընթերցեցին պիեսը, նրանք զգում էին ժամանակը եւ սոցիալական խնդիրները»,- մեզ հետ զրույցում նշեց դրամատուրգ Անուշ Ասլիբեկյանը։ Հեղինակը կարծում է, որ թատերականացված ընթերցանությունը «Մերսեդեսի» վերջնական մեկնաբանությունը չէ։
Թատերականացված ընթերցանության ավարտին ծավալվեց քննարկում ստեղծագործական կազմի եւ հանդիսատեսի միջեւ։
Կարդացեք նաև
Վովա ԱՐԶՈՒՄԱՆՅԱՆ
«Առավոտ» օրաթերթ
28.02.2023
