ԱԺ մարդու իրավունքների պաշտպանության եւ հանրային հարցերի մշտական հանձնաժողովի նիստում այսօր քննարկվում է ՄԻՊ թեկնածու առաջադրելու հարցը։ Իշխող «Քաղաքացիական պայմանագրի» թեկնածուն գլխավոր դատախազի գործող տեղակալ Անահիտ Մանասյանն է, իսկ ընդդիմադիր «Պատիվ ունեմ» եւ «Հայաստան» խմբակցությունների թեկնածուն՝ Էդգար Ղազարյանը։
Մթնոլորտը կրկին թեժացավ այն բանից հետո, երբ 2018թ․-ին կատարվածը Էդգար Ղազարյանը որակեց «ադրբեջանաթուրքական հեղափոխություն»։ Բղավոցները չէին դադարում։ «Ո՞ւմ ասիր, արա՜։ Ո՞վ ես դու, արա՜, որ ժողովրդի հեղափոխությունն անվանես ադրբեջանաթուրքական»,-բղավեց ՔՊ-ի պատգամավոր Արթուր Հովհաննիսյանը եւ հավելեց,-«Լեզուն կկտրեմ նրա, ով այդպես կասի։ Համարեք սպառնալիք»։
Նիստը վարող Թագուհի Թովմասյանն առաջարկեց ներողություն խնդրել, սակայն Էդգար Ղազարյանը պարզաբանեց, որ ոչ թե ժողովրդին նկատի ունի, այլ կատարվածի շահառուին։
Կարդացեք նաև
Բղավոցներն ու վիրավորանքները վերսկսեցին, եւ ՔՊ-ն Արթուր Հովհաննիսյանի առաջարկով դուրս եկավ դահլիճից։ «Հիվանդ մարդ է», «դավաճանը դու ես այ թուրք»,-ասում էին նրանք։
Լուիզա ՍՈՒՔԻԱՍՅԱՆ