Երևանի քաղաքապետարանը «Երևանի ավտոբուս» ՓԲԸ–ին նվիրաբերեց նոր ներկրված 150 հատ Zhongtong bus LCK6860HGN մակնիշի և 87 հատ MAN LION’S CITY 12C մակնիշի ավտոբուսներ։ Այս որոշումը 45 կողմ ձայնով ընդունվեց այսօր Երևանի ավագանու արտահերթ նիստում:
Զեկուցմամբ հանդես եկող քաղաքապետարանի ֆինանսական վարչության պետ Վիլեն Արևշատյանը (լուսանկարում) հավաստիացրեց, որ գույքը հանձնելուց հետո ընկերությունն իրականացնելու է մաքսազերծման և ճանապարհային ոստիկանության ձևակերպման աշխատանքները:
Որոշման ընդունումը պայմանավորված է Երևանի հանրային տրանսպորտի նոր երթուղային ցանցի ներդրման գործընթացով, որը իրականացնելու է «Երևանի ավտոբուս» ՓԲԸ-ն։
Նախատեսվում է քաղաքային տրանսպորտի 29 ավտոբուսային երթուղիները համալրել նոր շարժակազմով և ավելացնել ավտոբուսային երթուղիների քանակը՝ միաժամանակ ավելացնելով ուղևորափոխադրումների ծավալը և ստեղծելով նոր աշխատատեղեր:
Կարդացեք նաև
Միաժամանակ, հիշյալ ավտոբուսների մասով «Երևանի ավտոբուս» ՓԲԸ-ի կողմից ՀՀ կառավարություն է ներկայացվել հայտ՝ գերակա ոլորտում իրականացվող ներդրումային ծրագրի շրջանակներում ներմուծվող տեխնոլոգիական սարքավորումների, դրանց բաղկացուցիչ ու համալրող մասերի, հումքի և նյութերի նկատմամբ ներմուծման մաքսատուրքից ազատելու վերաբերյալ։ Ճանապարհային ոստիկանությունում ավտոբուսների համապատասխան հաշվառումն ու գրանցումներն իրականացվելու են կրկին «Երևանի ավտոբուս» ՓԲԸ-ի կողմից։
Հիշեցնենք, որ Երևանի քաղաքապետարանի ապրիլի 3-ի գործակարգավարական նիստի ընթացքում քաղաքապետարանի տրանսպորտի վարչության պետի ժամանակավոր պաշտոնակատար Հայկ Սարգսյանը տեղեկացրեց, որ մինչև ապրիլի 15-ը շահագործման կհանձնվեն նոր ներկրված ավտոբուսներից շուրջ 40-ը:
Լուսինե ՄԱՐԳԱՐՅԱՆ
