Սիրված քանոնահար, միջազգային մրցույթների հաղթող Մարիաննա Գեւորգյանը նոր է վերադարձել Հնդկաստանի Կեռալա նահանգի Կոչի քաղաքից:
«Այնտեղ հանդես եմ եկել իմ ազգային նվագարան քանոնով, ներկայացրել եմ բացառապես ազգային երաժշտություն: Մենահամերգը կազմակերպվել էր EXPO 2023-ի շրջանակում՝ Հնդկաստանի կառավարության կողմից»,- «Առավոտի» հետ զրույցում ասաց երաժիշտը:
«Նվագեցի հնդիկ երաժիշտների հետ տաբլա՝ Մահեշ Մանի, հարվածային գործիքներ՝ Ջիշնու Վարմա եւ ստեղնաշարային գործիք՝ Ռոհիդ Կրիշնա: Որպես բարեկամական քայլ, նաեւ հնդկական մի երգ նվագեցի, որը կատարեց երգչուհի Ամրիտա Ռաջան:
Նախատեսված մեկժամյա ծրագիրը երկարաձգվեց եւս կես ժամ, հանդիսատեսը չէր հեռանում ու բաց չէր թողնում մեզ, իսկ համերգից հետո մարդիկ մոտենում էին ծանոթանում, նկարվում ու շնորհակալություն հայտնում: Ինձ համար անակնկալ էր, երբ համերգի ավարտին բեմ բարձրացան Հնդկաստանի կառավարության ներկայացուցիչները եւ ինձ շնորհեցին հատուկ մրցանակ: Երաժշտության միջոցով փորձեցի նրանց մտովի Հայաստան տեղափոխել: Կարծում եմ՝ հաջողվեց, դրա համար էլ խոստացան, որ մայիսին կգան Հայաստան»,-ասաց Մարիաննա Գեւորգյանը:
Մեր զրույցի ընթացքում անդրադարձ եղավ նաեւ մի յուրահատուկ պրեմիերայի՝ Կոմիտասի անվան կամերային երաժշտության տանը կայացել է կոմպոզիտոր, դիրիժոր, Տաջիկստանի ժողովրդական արտիստ Տոլիբխոն Շախիդիի Կոնչերտո Գրոսո՝ քանոնի, ջութակի ու կամերային նվագախմբի համար ստեղծագործության պրեմիերան, նվիրված Արամ Խաչատրյանի ծննդյան 120-ամյակին: Ի դեպ, տաջիկ կոմպոզիտորը եղել է Արամ Խաչատրյանի սիրելի սաներից մեկը:
Համերգին բեմում էր Հայաստանի պետական կամերային նվագախումբը, քանոնի մենանվագը վստահված էր Մարիաննա Գեւորգյանին, ջութակահարն էր՝ վիրտուոզ երաժիշտ Կարեն Շահգալդյանը, իսկ դիրիժորական վահանակի մոտ էր Մաքսիմ Նովիկովը:
Կարդացեք նաև
Տոլիբխոն Շախիդին հետաքրքիր դրվագներ պատմեց՝ Արամ Խաչատրյանի հետ կապված: Հայ մեծանուն կոմպոզիտորը նրան որակել էր տաղանդավոր ուսանող եւ պատգամել. «Հիշիր, դու ստեղծագործելիս պետք է պահես քո ազգային դիմագիծը»: Տաջիկ երաժիշտն ասաց, որ առայսօր հետեւում է Արամ Իլյիչի խորհրդին ու ինքն էլ նույնը մշտապես մաղթում է բոլոր երաժիշտներին:
Գոհար ՀԱԿՈԲՅԱՆ
«Առավոտ» օրաթերթ
11.05.2023
