ԱԺ նիստում բյուջեի կատարողականի քննարկման ժամանակ ԱԺ փոխնախագահ Հակոբ Արշակյանը ներկայացրեց 2001-2003 թվականների պետական գույքի մասնավորեցման ծրագիրը՝ նշելով, որ ուզում է հիշեցնել, թե ով է իրականում Հայաստանը արդյունաբերական երկրից վերածել բանանային պետության։
Նա թվարկեց այն բոլոր կառույցները, որոնք մասնավորացվել են այդ ծրագրով՝ նշելով, որ կոպեկներով սեփականաշնորհվել են գիտահետազոտական ինստիտուտներ, լեռնամետալուրգիական ձեռնարկություններ, արդյունաբերական հսկաներ, բանկեր, պետական շենք-շինություններ։
«Ուզում եմ տեղեկացնել մեր քաղաքացիներին ու այս գիտահետազոտական ինստիտուտների եւ պետական հիմնարկների թիվը 932 է։ Ամբողջ Հայաստանն է մտնում սրա մեջ, մենք գիտեինք 90-ականների մութ ժամանակ է արվել, դու մի ասա 2001 թվականի լույսով է արվել։ Բա դուք ո՞ւր էիք այդ ժամանակ, պարոն Խաչատրյան, որ Հայաստանը բանանային պետություն էր դառնում։ Բա դուք ո՞ւր էիք, որ հազարավոր հաստոցներ մետաղի ջարդոնի տեղ Հայաստանից դուրս էր հանվում։ Լավ, ես փոքր էի, բա դուք ո՞ւր էիք։ Այս ցանկը տարեք տվեք ձեր առաջնորդին, ասեք՝ էս որ ստորագրում էիր, ի՞նչ էիր մտածում, որ էս բոլորը պիտի աշխատի՞»,- ընդդիմադիր պատգամավորներին դիմեց Հակոբ Արշակյանը։
Նա հավելեց․ «Հիմա Հայաստան են եկել տասնյակ հազարավոր տաղանդավոր մարդիկ, նրանց հետ շփվում ես, քեֆդ բերում են։ Որեւէ երկիր կերազեր 5 հոգի ըտենց մարդ ընդուներ, մենք ընդունել ենք տասնյակ հազարավորներ։ Ինչո՞ւ է դա տեղի ունեցել, որովհետեւ պետությունը կրկնապատկել է գիտության ֆինանսավորումը, քառապատկել է ռազմարդյունաբերության հետազոտության բյուջեն։ Մեր պաշտպանական կարիքների ահռելի մասն այսօր Հայաստանում արտադրվում է։ Այս հսկայական գիտահետազոտական ինստիտուտներն ունենալով հանդերձ՝ ինչի՞ համար դա 2000-ականներին չէր արվում, որովհետեւ չունեիք այդ կամքը»։
Կարդացեք նաև
Ռոզա ՀՈՎՀԱՆՆԻՍՅԱՆ
