Aravot.am-ի տեղեկություններով՝ Լոռու մարզային քննչական վարչությունում նյութեր են նախապատրաստվում «Լոռի» ջրօգտագործողների ընկերությունում մի շարք աշխատակիցների անօրինական աշխատավարձերի հետ կապված:
Մասնավորապես՝ պետական շահերի պաշտպանության հայց հարուցելու լիազորությունների շրջանակներում «Լոռի» ջրօգտագործողների ընկերությունում իրականացվող ուսումնասիրության արդյունքում, ինչպես նաեւ ՊԵԿ-ի, ՀՀ ՆԳՆ ոստիկանության եւ ՔՈԳ վարչությունից ստացված փաստաթղթերի ուսումնասիրությամբ պարզվել է, որ 2019-2022 թթ ընթացքում որպես գլխամասի հսկիչ ընդունված Ա.Մ-ն տարբեր տարիներին պարբերաբար 3-4 ամիս բացակայել է հանրապետությունից, սակայն ընկերության իրավասու աշխատակիցները իրենց ծառայողական լիազորությունները և ծառայողական դիրքից բխող հեղինակությունն օգտագործելով, իրենց վստահված գույքը հափշտակելու դիտավորությամբ ընկերության աշխատակիցների աշխատավարձերի վճարման տեղեկագրերում և ցուցակներում ներառել են Ա.Մ.-ի կողմից աշխատանքի հաճախելու մասին կեղծ տեղեկություններ, այնուհետև բովանդակությամբ կեղծ այդ փաստաթղթերն օգտագործելով դրել են շրջանառության մեջ, ինչի արդյունքում Ա.Մ.-ին ավել է հաշվարկվել և վճարվել շուրջ 850.000 դրամ աշխատավարձ:
Իրավապահ համակարգում ստացված տեղեկություններով՝ նույն ընկերության տարբեր հաստիքներում ձևակերպված 55 աշխատակիցներ, 2020-2022 թթ. զուգահեռ աշխատել են պետական և տեղական ինքնակառավարման մարմինների կողմից ստեղծված կազմակերպություններում՝ դպրոցներում, համայնքային ոչ առևտրային կազմակերպություններում, բժշկական կենտրոնում, միաժամանակ 3 այլ վայրերում, վարձու աշխատակիցներ հանդիսանալու պայմաններում, ընկերության իրավասու աշխատակիցները իրենց ծառայողական լիազորությունները և դրանցով պայմանավորված ազդեցությունն օգտագործելով, հիշյալ անձանց անվամբ հաշվարկել և վճարել են ընդհանուր շուրջ 41.438.000 հազար դրամ աշխատավարձ այդ կերպ հափշտակելով իրենց վստահված առանձնապես խոշոր չափերով գույքը:
Քննչական կոմիտեի մամուլի խոսնակ Գոռ Աբրահամյանը Aravot.am-ին հայտնեց, որ Լոռու մարզային քննչական վարչությունում ՀՀ քրեական օրենսգրքի 256-րդ հոդվածի 3-րդ մասի 3-րդ կետով և ՀՀ քրեական օրենսգրքի 457-րդ հոդվածի 2-րդ մասով նախաձեռնվել է քրեական վարույթ, կատարվում է նախաքննություն:Վարույթը նախաձեռնվել է 3 ամիս առաջ: Ըստ քննչական կոմիտեի խոսնակի՝ ներկա դրությամբ քննությունը շարունակվում է, որեւէ անձի մեղադրանք դեռեւս չի առաջադրվել:
Կարդացեք նաև
Էդվարդ ԱՐԶՈՒՄԱՆՅԱՆ
