Aravot.am-ն ահազանգ է ստացել այն մասին, որ Համահայկական 8-րդ ամառային խաղերին
ընդառաջ՝ Գյումրու «Շիրակ» ֆուտբոլային ակումբի մոտակայքում ինչ-որ անձ տաղավար է տեղադրել՝ սառնարանով, որի մեջ հյութեր են եղել ու պատրաստվել է փող աշխատելու։
Տեղի ոստիկանությունը դիմել է Գյումրու համայնքապետարանի անօրինական շինությունների և հողազավթումների բաժնի պետի ժամանակավոր պաշտոնակատար Գոռ Սարոյանին, որպեսզի վերջինս հեռացնի տաղավարը, քանի որ ապօրինի է, նաև տգեղ․ Գյումրին 11 հազար հյուր պիտի ընդունի, պիտի այցելեն նաև կառավարության անդամները՝ վարչապետի գլխավորությամբ։
Ըստ ահազանգի՝ Գոռ Սարոյանը ոստիկանությանը պարզաբանել է, թե չի կարող հենց այնպես հանել տաղավարը, քանի դեռ չի պարզվել, թե ով է տերը, տվյալ դեպքում ապօրինության հեղինակը։
Սակայն կարճ ժամանակ անց պարզվել է, որ ապօրինության հեղինակը հենց Գյումրու համայնքապետարանի անօրինական շինությունների և հողազավթումների բաժնի պետի ժամանակավոր պաշտոնակատար Գոռ Սարոյանն է․ տաղավարը նրանն է։
Կարդացեք նաև
Ոստիկանությունը հեռացնել է տվել այն։
Aravot.am-ը պարզաբանում ստանալու նպատակով դիմեց Գոռ Սարոյանին՝ հետաքրքրվելով, թե իրակա՞ն է այս պատմությունը։
Քաղաքապետարանի պաշտոնյան վստահեցրեց, որ ինքը կապ չունի տաղավարի հետ: Իրեն են դիմել ոստիկանությունից առ այն, որ «Շիրակ» ֆուտբոլային ակումբի մոտակայքում երեք տաղավար է տեղադրված եղել՝ կարմիր մեծ անձևրանոցներով, սառնարանով, ինքն էլ գտել է տիրոջը, բանակցել և հեռացնել է տվել։
Նա նաև ասաց, որ ինքը տեղեկացրել է ոստիկանությանն այն մասին, որ քաղաքապետարանի անօրինական շինությունների և հողազավթումների բաժինը չի կարող առանց վարչական արձանագրության՝ վերցնել տաղավարներն ու հեռացնել, դա կլինի ապօրինություն, այդ դեպքում տերը կարող է դատի տալ իրենց, թե գույքս վնասել են։
Ըստ պաշտոնյայի՝ քաղաքապետարանը նման իրավասություն չունի, եթե ոչ բնակչի հետ բանակցելով, ապա պիտի օրենքով շարժվի․ արձանագրություն կազմի, բնակչին այս մասին տեղյակ պահի, վարչական վարույթ նախաձեռնի, իսկ այս ամենն առնվազն երկու շաբաթ տևի։
Քաղաքապետարանի պաշտոնյան չի բացառում, որ վաղը, երբ Գյումրին կունենա 11 հազար հյուր, շատերը կփորձեն առիթն օգտագործել ու տաղավարներ տեղադրել և ոչ միայն «Շիրակ» ֆուտբոլայի ակումբի մոտակայքում, այլեւ՝ կենտրոնական հատվածներում։
Նունե ԱՐԵՎՇԱՏՅԱՆ
