ՍԴ Հնչակյան Կուսակցության Կենտրոնական Վարչությունը խստորեն դատապարտում է Ադրբեջանի սանձազերծած պատերազմական գործողությունները Արցախի հանրապետության խաղաղ բնակչության դեմ: Ակնհայտ է, որ Ալիեւի բռնապետական վարչակարգը այս գործողությամբ ավարտին է ուզում հասցնել 44-օրյա պատերազմից հետո կիսատ մնացած՝ Արցախի հայաթափման ու զավթման ծրագիրը:
Ակնհայտ է նաև, որ Ռուսաստանի խաղաղապահ ուժերը, որոնք կոչված են ապահովելու Արցախահայության անվտանգությունն ու ապահովությունը, եւս մեկ անգամ ցուցաբերում են իրենց կատարյալ անկարողությունն ու անզորությունը՝ կասեցնելու ադրբեջանական հերթական հարձակումը, փորձելով ստեղծված իրավիճակի պատասխանատվությունը բարդել այլոց վրա: Անընդունելի ենք համարում Ռուսաստանի նման պահվածքը և կրկին կոչ անում կատարել` Նոյեմբեր 9-ի համաձայնությամբ ստանձնած պարտավորությունները:
Մյուս կողմից, կոչ ենք անում միջազգային ընտանիքին և մասնավորապես ՄԱԿ-ի Անվտանգության Խորհրդին՝ զանց անել անարդյունավետ դատապարտումի կոչերը և անհապաղ սահմանել պատժամիջոցներ, կասեցնելու Ադրբեջանի հեռահար նկրտումները:
Այս ճակատագրական պահին, երբ բոլորս լցված ենք ցասման և ընդվզումի զգացումներով, ավելի քան կարևոր է լինել միասնական և պահպանել ներքին անդորրը: Առ այդ, կոչ ենք անում մեր հայրենակիցներին չտրվել սադրանքների և անխոհեմ քայլերի, որոնք բացի ներքին անկայունություն առաջացնելուց ու մեր ուժերը ջլատելուց, ոչինչով են նպաստելու իրավիճակի հանգուցալուծման:
Կարդացեք նաև
Ս.Դ. Հնչակյան Կուսակցության Կենտրոնական Վարչություն
Սեպտեմբեր 19, 2023
