Քիչ առաջ ամփոփվեցին Երեւանի ավագանու նիստում քաղաքապետի ընտրության արդյունքները։ Քվեարկությանը մասնակցել է ավագանու 37 անդամ, անվավեր քվեաթերթիկ չկա, վավեր թերթիկները՝ 37։
Քաղաքապետի թեկնածու էր առաջադրվել միայն Տիգրան Ավինյանը։ Նրա թեկնածությանը կողմ է քվեարկել ավագանու 32 անդամ, դեմ՝ 5։
Հայտարարվեց՝ Երեւանի քաղաքապետ ընտրվեց Տիգրան Ավինյանը։
Հիշեցնենք, որ Երեւանի ավագանու՝ սեպտեմբերի 17-ին տեղի ունեցած ընտրությունների արդյունքներով ավագանի են անցել «Քաղաքացիական պայմանագիր»-ը՝ 24 անդամով, «Ազգային առաջընթաց»-ը՝ 14 անդամով, «Հանրապետություն»-ը՝ 8 անդամով, «Հանրային ձայն»-ը՝ 7 եւ «Մայր Հայաստան» դաշինքը՝ 12 անդամներով։
Կարդացեք նաև
«Հանրային ձայն» խմբակցությունից նիստին մասնակցում են 5 անդամներ, քանի որ նրանց ղեկավար Արտակ Գալստյանը կալանավորված է, իսկ մյուս անդամը՝ Տիգրան Ուրիխանյանը հետախուզման մեջ է։
Նիստին չեն մասնակցել «Մայր Հայաստան» դաշինքն ու Հայկ Մարությանի գլխավորած «Ազգային առաջընթացը»։ Եթե «Հանրային ձայնը» նույնպես չմասնակցեր նիստին, ապա քվորում չէր լինելու, եւ ընտրությունը ձախողվելու էր։
Նելլի ԲԱԲԱՅԱՆ