Այսօր 2024-ի պետբյուջեի նախագծի քննարկման ժամանակ ՔՊ պատգամավոր Մաթեւոս Ասատրյանը Երեւանի քաղաքապետ Տիգրան Ավինյանին հարցրեց ապօրինի շենք-շինություններից. «Քաղաքացիները, որոնք կապ չունեն առհասարակ պետական հողերի հետ, իրար մեջ առեւտուր են անում: Այս վերջում ականատես եղանք ապօրինի շենքերի քանդման մի քանի աշխատանքների: Ժողովրդի մոտ տպավորություն չառաջանա, որ եթե մեկն արել է, ինչ-որ ձեւ ներվել է, չեն քանդել, ուրեմն մյուսին էլ այդ հնարավորությունը կտրվի: Տունը մի քանի օրում չեն սարքում, չեն վերահսկում, ի՞նչն է պատճառը, որ թույլ ենք տալիս էդ տունը սարքի, հետո նոր գնում ենք, քանդում»:
Տիգրան Ավինյանը պատասխանեց. «Անկեղծորեն, ինձ համար տարբերություն չկա՝ մարդը համայնքի բյուջեի՞ց է փող գողանում, թե՞ համայնքի հողային ֆոնդից հող է գողանում: Մարդիկ որոշակի աշխատանքներ իրականացնում են՝ այն հույսով, որ այս մարդիկ կգնան, կգան մյուսները, կպայանավորվենք, մի բան կանենք, մի բան կլինի: Էդ «մի բան կանենք, մի բան կլինիի» հետեւանքով Սիլիկյան թաղամասում 21 շինություն կառուցվեց մեկ ամսվա ընթացքում եւ 2 օրվա ընթացքում Երեւանի քաղաքապետարանը քանդեց: Այդտեղ մենք չունենք որեւէ կոմպրոմիսի եւ քննարկման եզր: Այդ հարցը մեզ մոտ շատ կոշտ է դրված եւ էականորեն ավելացրել ենք ե՛ւ վարչական տույժերի քանակը, ե՛ւ քանդումների քանակը: Վերջին 1 տարվա ընթացքում Երեւան քաղաքում այգիներից, մայթերի վրայից, տարատեսակ համայնքային հողատարածքների վրայից քանդվել են բազմաթիվ կրպակներ, հին սրճարաններ, կիսակառույց շինություններ: Եվ դա հետեւողականորեն շարունակելու ենք, որովհետեւ նույնիսկ եթե մշակութային մակարդակով դա մեր մեջ նստած է, սենց պինցետով պետք է հանենք մեր մեջից, որովհետեւ դա գողություն է»:
Ավինյանը վստահեցրեց, որ որեւէ նախընտրական շրջանում էլ որեւէ խոստում չի տվել, որ ապօրինի շինությունները կօրինականացնի. «Զգուշացրել ենք բազմաթիվ անգամներ, ասել ենք՝ ժողովուրդ ջան, մի՛ արեք: Հետո հենց սկսեցինք քանդել՝ բա հարայ-հուրույ, միացրեցին բոլոր հնարավոր…Լավ, շատ չբարկանամ»:
Հռիփսիմե ՋԵԲԵՋՅԱՆ
