Երևան քաղաքի ընդհանուր իրավասության դատարանի Կենտրոն և Նորք-Մարաշ նստավայրում, դատավոր Մնացական Մարտիրոսյանի նախագահությամբ, այսօր հրապարակվեց ԵԿՄ նախկին նախագահ Մանվել Գրիգորյանի եւ նրա կնոջ` Նազիկ Ամիրյանի դատավճիռը:
Մանվել Գրիգորյանը մեղավոր ճանաչվեց, նրա կինը դատապարտվեց վեց տարվա, ապա վերջնական պատիժը մնաց 5 տարի 11 ամիս, 27 օրվա ազատազրկումը, սակայն դատարանը կիրառեց համաներում:
Հիշեցնենք, որ Նազիկ Ամիրյանը մեղադրվում է ամուսնու, այլ անձանց հետ նախնական համաձայնությամբ ապօրինաբար զենք-զինամթերք ձեռքբերելու, փոխադրելու ու իրենց պատկանող տներում պահելու համար:
Դատարանը նաեւ այսօր բավարարեց Մանվել Գրիգորյանի եւ նրա կնոջ նկատմամբ ներկայացված 4 քաղհայցեր, որոնք ներկայացվել էին դատախազի, ԵԿՄ-ի ու մեկ տուժողի կողմից:
Կարդացեք նաև
Դատարանը պարտավորեցրեց վերադարձնել վնասի չափից 1 միլիարդ 250 միլիոն դրամ, 562 միլիոն դրամ, 102 միլիոն դրամ, 101 միլիոն դրամ:
Վճռի օրինական ուժի մեջ մտնելուց հետո Մանվել Գրիգորյանից հօգուտ ՀՀ պետական բյուջեի կբռնագանձվի շուրջ մեկ միլիարդ ութ հարյուր միլիոն ՀՀ դրամ, 8 ավտոմեքենա, բացի այս՝ շուրջ 8 հազարի հասնող «Զինվորի բաժին» մակնշմամբ մթերք, հանդերձանք, դեղորայք կտրվի ԵԿՄ-ին, իսկ մի քանի տասնյակ հազարի հասնող զենք և զինամթերք կտրվի ՀՀ պաշտպանության նախարարության տնօրինմանը։ Դատարանի որոշմամբ այս գործով տուժողի իրավահաջորդ Հ. Թորոսյանին կվերադարձվի Վաղարշապատում գտնվող 1 բենզալցակայան։
Նազիկ Ամիրյանից կբռնագանձվի շուրջ հարյուր մեկ միլիոն երկու հարյուր հազար ՀՀ դրամ, իսկ նրա հաշիվները, շարժական, անշարժ գույքերը կմնան կալանքի տակ՝ մինչև դատավճռի կատարումը:
Ամիրյանի պաշտպան Գուրգեն Գրիգորյանն ասաց, որ միայն 933 միլիոն դրամը անհատների ու հիմնադրամների հատկացրած գումարներն են ԵԿՄ-ին, որոնց հետ կապ չունի պետությունը: Ըստ նրա՝ բռնագանձման ներկայացված գումարների թվերն էլ անհասկանալի է՝ որտեղից են վերցրել:
Փաստաբանը պնդեց, որ դատական ակտը ակնհայտ քաղաքական պատվերի մասին է վկայում ու իրենք պատրաստվում են բողոքարկել, որովհետեւ նման դատավճիռը, եթե դառնա նախադեպ, ապա ազգի գլխին իսկական փորձանք է դառնալու:
Արփինե ՍԻՄՈՆՅԱՆ
Լուսանկարը՝ արխիվային
