Ռոման Հովհաննիսյանը տասնմեկ տարեկան է, ծնվել և ապրում է Գառնիում։ Հայրը շինարար բանվոր է, մայրը զբաղվում է որդու և դստեր դաստիարակությամբ։ Ռոմանը Գառնիի ըմբշամարտի դպրոցի սան է:
Ըմբշամարտով զբաղվում է հինգ տարեկանից։ Վերջին երկու տարիներին նա մասնակցում է ինչպես մարզային, այնպես էլ արտերկրում Հայաստանը ներկայացնող մրցումներին։ Թեև իր քաշը 39 կգ. է, նա գրեթե միշտ հաղթանակով մրցում է 41-42 կգ. քաշային կարգ ունեցող պատանիների հետ։
Ռոմանի տարած 29 հաղթանակներից 16-ը զբաղեցնում են առաջին հորիզոնականը։ Մեծ ոգևորությամբ է խոսում հատկապես Պարսկաստանում Օլիմպիական չեմպիոն Հասսան Յազդանի, և 2022 թվականին Մոսկվայում Հերակլիոնի անվան մրցումներում 1-ին տեղը գրաված իր հաղթանակների մասին։
-Իսկ հազվադեպ պարտվելիս ի՞նչ ես զգում,-հարցին պատասխանեց.
Կարդացեք նաև
-Զայրանում եմ իմ վրա, բայց նաև սովորում եմ իմ սխալների վրա։
-Չե՞ս հուսահատվում:
-Չէ, հակառակը. աշխատում եմ ավելի շատ, ավելի լավ մարզվել հաջորդ մրցումներին հաղթելու համար։
-Մի քիչ էլ խոսենք դպրոցից։ Ո՞ր դասարանում ես։
– Սովորում եմ համար 1-ին դպրոցում, 6-րդ դասարանում։
– Սպորտով զբաղվածությունը դասերիդ չի՞ խանգարում։
-Չէ, ավելի օգնում է, չեմ հոգնում, պարապ մնալու ժամանակ չի մնում։ Հենց պարապ եմ մնում՝ հոգնում եմ։
-Ո՞ր առարկան ես սիրում։
-Մաթեմատիկան։ Ասե՞մ ինչու։ Որովհետև մաթեմատիկան ինձ ստիպում է, որ ես ճիշտ մտածեմ ու իրեն հաղթեմ։ Ես սիրում եմ հաղթել։
-Ռոման, 2024 թվականի, կամ ապագայի հետ կապված, առհասարակ, ի՞նչ ծրագրեր, երազանքներ ունես։
-Ես ծնվել եմ վիշապի տարին. 2024 թվականը իմ տարին է։ Պիտի ձգտեմ հասնել հաղթանակների։
Իսկ երազանքս՝ Օլիմպիական չեմպիոն դառնալն է ու Գառնիում իմ անվան ըմբշամարտի դպրոց բացելը։
…Նայում եմ Ռոմանի հաստատուն հայացքին ու ինքնավստահ, ամուր բնավորություն արտահայտող դեմքին և համոզվում եմ, որ Օլիմպիական հաղթանակներ երազող այս սերունդն է կերտելու Հայաստանի պայծառ ապագան…
Անահիտ ՔՆԱՐՅԱՆ
