«Գալաքսի» ընկերությունների խմբի բոլոր բիզնեսները ստեղծվել են զրոյից, դրանք ստեղծվել են մարդկային կապիտալի, ծանր աշխատանքի եւ ինովացիոն մտածելու շնորհիվ»,-այս մասին այսօր «Արհեստական բանականությունը բիզնեսի համար» համաժողովի ժամանակ լրագրողների հետ ճեպազրույցում ասաց ՊԵԿ նախկին նախագահ Գագիկ Խաչատրյանի որդի, «Գալաքսի» ընկերությունների խմբի համահիմնադիր Արտյոմ Խաչատրյանն՝ ի պատասխան հարցի՝ կիսո՞ւմ է տեսակետը, որ հոր պաշտոնական դիրքի շնորհիվ է բիզնեսի առաջխաղացում ունեցել եւ հարստացել։
Արտյոմ Խաչատրյանի խոսքով՝ Գագիկ Խաչատրյանը չէր կարող 250 միջազգային գործընկերների հետ խոսել․ «Նա ընդհանրապես կապ չունի մեր բիզնեսների զարգացման հետ: Նա մեր հայրն է, մենք արել ենք բիզնես գործունեություն եւ Հայաստանում այսօր ունենք 2500-ից ավելի աշխատող, որոնց միջին աշխատավարձը 400 հազար դրամ է»։
Նելլի ԲԱԲԱՅԱՆ