«Իմ համբերությունն էլ արդեն սկսում է սպառվել այս ծրագրի հետ կապված»,-այս մասին այսօր Երեւանի քաղաքապետարանի գործակարգավարական խորհրդակցության ժամանակ ասաց քաղաքապետ Տիգրան Ավինյանը՝ Արզումանյան 10 եւ 17 վթարային շենքերի բնակիչների վերաբնակեցման ծրագրի մասին։
Խորհրդակցության ժամանակ զեկուցվեց, որ այս ամսվա սկզբին կնքվել է պայմանագիր ներդրողի եւ Երեւանի քաղաքապետարանի միջեւ, Արզումանյան 10 եւ 17 վթարային շենքերի բնակիչներին անցած շաբաթվա վերջում գրավոր ծանուցվել է, ինչպես նաեւ պայմանագրային նախագծերը, որպեսզի բնակիչներն ուսումնասիրեն, այս շաբաթ կլինեն քննարկումներ, եւ եթե հնարավոր լինի՝ որոշակի փոփոխություններ կարվեն։
Տիգրան Ավինյանն արձագանքեց՝ այս գործընթացը նախաձեռնվել է բնակիչների պահանջով, 2022 թվականի սեպտեմբերից այս ծրագիրը քաղաքապետարանն իրականացնում է․ «Այլեւս հավելյալ քննարկումներն ընդունելի չեն։ Եթե մինչ այս պահը մենք չենք եկել այն եզրահանգումներին, որ արդեն հստակ է, սա է ստանդարտը, այլեւս ոչ մի քննարկում ընդունելի չի լինելու։ Չի կարելի դարերով քննարկել, պետք է սկսել իրագործել։ Այս մարդիկ ապրում են 4-րդ աստիճանի վթարային շենքերում, եւ Աստված մի արասցե՝ մի բան պատահի։ Քանի՞ տարի պետք է իրենց հետ քննարկենք այն հարցը, որ ժողովուրդ ջան, վտանգավոր է ձեր կյանքի համար ու ձեր պահանջով է իրականացվում սա, ամենալավ պայմաններով է իրականացվում։ Հետեւապես խնդրում եմ՝ մի քիչ տեմպ հաղորդել»։
Կարդացեք նաև
Նելլի ԲԱԲԱՅԱՆ
