Երևան քաղաքի ընդհանուր իրավասության դատարանի Կենտրոնի նստավայրում՝ դատավոր Սուսաննա Գզոգյանի նախագահությամբ, «ՎԵՏՕ» հասարակական-քաղաքական շարժման ղեկավար Նարեկ Մալյանի գործով դատական նիստի ընթացքում նախագահող դատավորը մերժեց փորձագետի եզրակացությունն անթույլատրելի ճանաչելու` պաշտպանական կողմի միջնորդությունը։
Հիշեցնենք՝ Նարեկ Մալյանին ձերբակալել էին սեպտեմբերի 20-ին, երկու օր անց նա կալանավորվեց երկու ամսով: Նարեկ Մալյանին ձերբակալել են ՀՀ քրեական օրենսգրքի 329–րդ հոդվածի 2-րդ մասով նախատեսված հանցանքը կատարելու համար: Այն է՝ «ատելություն, խտրականություն, անհանդուրժողականություն կամ թշնամանք հրահրելուն կամ քարոզելուն ուղղված հրապարակային խոսքը, ինչպես նաև այդ նպատակով նյութեր կամ առարկաներ տարածելը»: Այս հոդվածով նախատեսվում է որպես պատիժ՝ 1-4 տարի ազատազրկում:
Նախագահող դատավորն ասաց՝ պաշտպանական կողմը կարող է իր սեփական նախաձեռնությամբ փորձագետ ներգրավել և երկու փորձաքննությունների արժանահավատությունը կգնահատի առանձին սենյակում դատավճիռ կայացնելիս։
Նարեկ Մալյանի պաշտպան Ռուբեն Մելիքյանն առարկեց նախագահող դատավորի որոշմանն ու ասաց․ «Լրացուցիչ փորձաքննություն կարող է նշանակվել բացառապես այն ժամանակ, երբ առաջնային փորձագետի եզրակացության մեջ ինչ-որ հարցերի տրվել են ոչ ամբողջական պատասխաններ։ Մենք արձանագրում ենք, որ սկզբնական փորձագետի եզրակացության ուսումնասիրությունը ցույց է տալիս, որ այն հարցերը, որոնք փորձագետի առաջ բարձրացրել ենք, դրանց տրվել են ոչ անորոշ, սպառիչ, հստակ պատասխաններ, պատասխաններ, որոնք ունեն արդարացնող բնույթ։ Դրանից հետո քննիչը նշանակել է լրացուցիչ փորձաքննություն՝ խախտելով ընթացակարգը։ Ի՞նչ՝ մենք կրկնակի փորձաքննություն անցկացնելու միջնորդությո՞ւն ներկայացնենք։ Մենք ամենևին շահագրգռված չենք լրացուցիչ փորձաքննության անցկացմամբ։ Մենք օգտվում ենք անմեղության կանխավարկածից»։
Կարդացեք նաև
Տաթև ՀԱՐՈՒԹՅՈՒՆՅԱՆ
