ՀՀ ԱԺ «Հայաստան» խմբակցության պատգամավոր Արմենուհի Կյուրեղյանը «Հայելի» ակումբում խոսեց վերջին երկու օրվա ընթացքում ընդդիմադիր խմբակցությունների պատգամավորների ապրումների մասին, որ ունեցան կառավարության հետ հանդիպման ժամանակ:
«Այդ երկու օրը կառավարությունը ներկայացնում էր, ըստ էության, 2023 թվականին կատարված աշխատանքների հաշվետվությունը: Զեկույց էր ներկայացնում խորհրդարանին, թե ինչ է կատարել 2023-ին՝ կառավարության 2021-2026 թվականների իրենց ծրագրին համահունչ: Փաստացիորեն, երբ դիտարկում ենք իրենց ծրագիրը եւ զեկույցը, ակնհայտորեն տեսնում ենք, որ այս կառավարությունը ոչ միայն չի կատարել իր ծրագիրը, որի համար իրենք ձայներ, քվեներ էին ստացել հանրությունից, դեռ ավելին. այս կառավարությունը իրականացրել է լրիվ՝ 180 աստիճան հակառակ գործունեություն: Եվ մեր ելույթներն ամբողջությամբ հենց դրան էին նվիրված:
Ինչ է խոստացել ազգային անվտանգության ոլորտում եւ ինչ է արել, ինչ է խոստացել ժողովրդավարության կայացման ոլորտում եւ ինչ ունենք այսօր»,- ասաց տիկին Կյուրեղյանը եւ առանձին օրինակներ մատնացույց արեց տարբեր այլ ոլորտներից:
Մասնավորապես, որ Հայաստանը լինելու է Արցախի ինքնորոշման իրացման եւ անվտանգության երաշխավորը, սակայն այսօր հայկական Արցախ չկա:
Կարդացեք նաև
Որ «ժողովրդավարության բաստիոն» Հայաստանում կան քաղբանտարկյալներ, որոնց ազատության մեջ գտնվելը իշխանությանը ձեռք չի տալիս: «Ես զարմանում եմ եվրոպական կազմակերպությունների վրա, որոնք հայ ժողովրդավարության կայացումը իրենց համար որպես առաքելություն են վերցրել, սակայն, պարզապես, երկակի ստանդարտներ են կիրառում: Հնարավոր չէ չտեսնել այն ամենը, ինչ կատարվում է այսօր Հայաստանում ժողովրդավարության ոլորտում»,-ասաց պատգամավորը՝ ընդգծելով, որ այս իշխանությունն այլեւս լեգիտիմ չէ, որովհետեւ նրանք ընտրվել են մեկ խոստումով՝ իրականացնում են բոլորովին այլ բան:
«Իսկ դա նշանակում է, որ կառավարությունը չի կատարել Ազգային ժողովի առջեւ վերցրած պարտականությունները, չի իրականացրել այդ ծրագիրը: Իսկ դա, բնականաբար, պետք է ծնի այս կառավարության հրաժարականի պահանջ»,-եզրակացրեց պատգամավորը:
Աշոտ ՀԱԿՈԲՅԱՆ
