«Ես համոզված եմ. որ ամենագլխավոր բանը գաղափար ունենալն է, դրան հավատարիմ լինելն ու դրանով առաջ շարժվելը:
80-ականների վերջին մեր ժողովրդի, մեր նոր ստեղծվող պետականության գաղափարը դարձավ միացումը: Հազարավոր ֆիդայական ջոկատներ միավորվեցին, ու մենք հաղթեցինք: Միավորման գաղափարը բերեց մեր պետության կայացմանը, այս տարածաշրջանում մեր պետության դերի եւ դիրքերի ամրապնդմանը: Բոլորը այս տարածաշրջանից խոսելիս ասում էին, որ ՀՀ-ն ունի կայացած բանակ:
Այսօր այդ միացում գաղափարը չի աշխատում բազմաթիվ պատճառներով: Դրա շուրջ մեր ժողովրդին համախմբելը գրեթե անհնար է»,- ԵՄ-ը միանալու համար ստորագրահավաք սկսելուն վերաբերող պանելային քննարկման ժամանակ ասաց «Հանրապետություն» կուսակցության նախագահ Արամ Սարգսյանը:
Հիշեցնենք, որ Եվրամիություն ձգտող հայաստանյան արտախորհրդարանական 4 ուժ սեպտեմբերի 4-ին դիմել է Կենտրոնական ընտրական հանձնաժողով՝ անդամակցության հարցով ստորագրահավաքի հնարավորություն ստանալու համար: Այդ ուժերն են «Հանրապետություն» «Հանուն Հանրապետության», Եվրոպական կուսակցության և Քրիստոնյա-ժողովրդավարական կուսակցությունները:
Կարդացեք նաև
«Այսօր էլ պատերազմ է, եթե ուզում ենք այդ պատերազմում հաղթել, պետք է գտնենք գաղափար, որը միավորում է: Այսօրվա պատերազմը ֆիդայական ջոկատների պատերազմ չէ, բարեբախտաբար, արդեն ունենք, բանակ: Այսօրվա պատերազմն ունի տարբեր դրսեւորումներ՝ hիբրիդայինից մինչեւ տնտեսական: Այսօրվա պատերազմը գաղափարի ընտրության պատերազմ է: Այդ գաղափարի ընտրության մեջ է, որ պետք է կարողանանք միավորվել, եթե միավորվում ենք, էլի կարողանում ենք հաղթել»,- ասաց Արամ Սարգսյանը:
Նա նկատեց, որ այսօր ժողովրդավարների ու ավտոկրատների պատերազմ է: Ըստ նրա՝ աշխարհի մի թեւում հավաքվել են ժողովրդավարները իրենց՝ ապագայի տեսլականով, մյուս կողմում՝ միապետները, ովքեր համարում են, որ իրենց ժողովրդին ժողովրդավարություն պետք չէ, դրա իմիտացիան բավարար է:
Արամ Սարգսյանի խոսքով, վերջին սոցհարցումները ցույց են տալիս, որ ժողովրդի 70 տոկոսը, թե՛ 2018-ի , թե՛ 2021-ի ընտրություններին ձայնը տվեց ժողովրդավարությանը. «Ցույց տվեց աշխարհաքաղական իր մոտեցումը: Ժողովրդի 70 տոկոսից ավելին կողմ է, որ դառնանք ժողովրդավար աշխարհի մաս, այսինքն՝ դառնանք ԵՄ անդամ: Ես կարծում եմ, որ դեպի Եվրոպա արվող հանրաքվեն կարող է միավորող ուժ դառնալ, որը կմիավորի մեր ժողովրդին»:
Արփինե ՍԻՄՈՆՅԱՆ
