Արարատի մարզի Արարատ գյուղի դպրոցի աշխարհագրության և ռազմագիտության ուսուցիչ Արտակ Մնացականյանին հորդորել են ազատման դիմում գրել և դպրոցից հեռանալ, քանի որ վերջինիս տեսել են, թե ինչպես է մտնում «Առաջարկ Հայաստանին» ուժի նախընտրական շտաբ, պարզել են, որ ԲՀԿ անդամ է եւ աշխատում է իր կուսակցության համար։ Տեսնողը նկարել է ուսուցչին՝ Գագիկ Ծառուկյանի շտաբ մտնելիս, ներկայացրել քաղաքապետարան կամ մարզպետարան, այնտեղից էլ հրահանգել են դպրոցի տնօրինությանը, որ Մնացականյանը չպետք է աշխատի: Դե իսկ տնօրենն էլ առաջարկել է նրան դիմում գրել՝ գնալ։
Արտակ Մնացականյանը մեր տեղեկությունները հաստատեց, «Հրապարակի» հետ զրույցում ասելով. «Ես աշխատում եմ Արարատ գյուղի դպրոցում` աշխարհագրության և պատմության ուսուցիչ: Ինձ համար կարմիր գիծ է դպրոցում քաղաքական քարոզչություն անելը, նման բան երբեք չի եղել, ես իմ աշխատանքն եմ կատարել բարեխղճորեն, սակայն քանի որ ՔՊ-ական չեմ, այլ ԲՀԿ-ական եմ, ինձ փաստի առաջ են կանգնեցրել, ասում են՝ պետք է հեռանամ դպրոցից»։
