«Ուժեղ Հայաստան» կուսակցության անվտանգային թիմի ղեկավար, պատերազմի հերոս Արթուր Ավանեսյանը կալանավորվել է 2 ամսով։ Այս որոշումը երեկ կայացրել է Հակակոռուպցիոն դատարանի դատավոր Արամ Գրիգորյանը։
Հիշեցնենք, որ ըստ Հակակոռուպցիոն կոմիտեի հաղորդագրության՝ «Փաստական տվյալներ են ստացվել այն մասին, որ «Ուժեղ Հայաստան» կուսակցության համակիրը 2026 թվականի հունիսի 7-ին կայանալիք Հայաստանի Հանրապետության Ազգային ժողովի ընտրություններին իրենց օգտին քվեարկելու դիմաց մի շարք ընտրողների աշխատանքի ընդունելու և այլ եղանակով խոստացել է տալ կաշառք, որպիսի խոստումն ընդունվել է վերջիններիս կողմից»:
Ըստ Հակակոռուպցիոնի հրապարակած ձայնագրության` Արթուր Ավանեսյանը քաղաքացուն դրական պատասխան է տալիս, երբ նա հարցնում է՝ իրեն պաշտոն կտա՞ բանակում: Հրապարակված գաղտնալսման մեջ քվեի դիմաց փող տալու մասին ակնարկ չկա:
Կարդացեք նաև
«Ուժեղ Հայաստան» կուսակցության քաղաքական խորհրդի անդամ Նարեկ Կարապետյանը գրել էր, թե որ արտահայտությունների համար են նրան ցանկանում կալանավորել. «Համ գործն ա ինյան, համ հողն ա ինյան, համ տոնն ա ինյան: Համ աշխատանք ենք ունենալու (300.000 աշխատատեղ): Համ հողն ենք մեր ունենալու (Ուժեղ խաղաղություն): Համ մեր տունն ենք ունենալու – (20.000 մատչելի բնակարան)»:
Փաստաբան Արամ Վարդևանյանը դատարանի բակում լրագրողներին ասել է, թե վտանգավոր մարտավարություն է որդեգրել Հակակոռուպցիոն կոմիտեն՝ փաստացի քրեականացնելով նախընտրական ծրագրերի ներկայացումը։
Պատգամավորի թեկնածու Արեգա Հովսեփյանի խոսքով՝ Ավանեսյանի տանն իրականացվել է խուզարկություն. «Խուզարկության ընթացքում որևէ առարկա քրեական վարույթին առնչվող չի հայտնաբերվել, ավելին՝ ապօրինի որևէ առարկա չի հայտնաբերվել»:
