ՀՀ կենտրոնական ընտրական հանձնաժողովի նախագահ Վահագն Հովակիմյանի մայիսի 7-ին հրավիրված ասուլիսը սկսվեց նախընտրական քարոզչության կանոնները ներկայացնող տեսանյութով: Մինչ հարցերին անցնելը՝ ԿԸՀ նախագահը առաջարկեց այս տեսանյութը տարածել, որ շատերը տեղյակ լինեն։
Լրագրողներից մեկի այն հարցին, որ ԿԸՀ նախագահին «Քաղաքացիական պայմանագիր» կուսակցության հետ են նույնականացնում, ինքը կկարողանա՞ հանրային այս վերաբերմունքը փոխել, ի պատասխան Վահագն Հովակիմյանը մասնավորապես նշեց, որ ինքը երեքուկես տարի է, ինչ ղեկավարում է ԿԸՀ աշխատանքները, սակայն չի եղել մի դեպք, որ ինքը պաշտոնը անձնական առավելություն դիտարկի։
«Այո՛, ես ունեմ ընտանիք, մեծացել եմ ծառայողների ընտանիքում, ես որբ չեմ մեծացել։ Այո՛, ես շատ ընկերներ ունեմ, ես դաստիարակվել եմ «ազնիվ ապրելն է բարոյական» սկզբունքով»,-ասաց Վահագն Հովակիմյանը։
Կարդացեք նաև
Այն դիտարկմանը՝ եթե կառավարող ուժը ճնշի նրան, ապա էլի ազնիվ լինելու սկզբունքը կպահպանի՞, թե՞ հրաժարական կտա՝ պատասխանեց. «Իշխանության ներկայացուցիչների անմեղության կանխավարկածը խախտեցիք՝ մեղադրելով, որ ընտրակեղծիք են անելու։ Ոչ, ես թույլ չեմ տա ոչ մեկը կեղծիք կատարի։ Ինձ ընտրել են գործող խորհրդարանի պատգամավորները ու այդ ժամանակ հայտարարել եմ, որ աշխատելու եմ հանուն Հայաստանի Հանրապետության, ու ոչ մի ընտրություն չի կեղծվելու»։
Արմեն ԴԱՎԹՅԱՆ
