Կայացել է Հայաստանին Միջերկրածովյան խորհրդարանական վեհաժողովում դիտորդի կարգավիճակ շնորհելու հանձնման հանդիսավոր արարողությունը
ՀՀ ԱԺ նախագահի տեղակալ Հակոբ Արշակյանը մայիսի 7-8-ը Բուդվայում անցկացվող Միջերկրածովյան խորհրդարանական վեհաժողովի 20-րդ լիագումար նիստի շրջանակներում մասնակցել է Միջերկրածովյան խորհրդարանական վեհաժողովի անդամ եւ գործընկեր երկրների խորհրդարանների նախագահների առաջին գագաթնաժողովին:
Գագաթնաժողովի շրջանակներում կայացել է Հայաստանին Միջերկրածովյան խորհրդարանական վեհաժողովում դիտորդի կարգավիճակ շնորհելու հանձնման հանդիսավոր արարողությունը:
ՀՀ ԱԺ նախագահի տեղակալ Հակոբ Արշակյանի եւ Միջերկրածովյան խորհրդարանական վեհաժողովի նախագահ Ջուլիո Չենտեմերոյի կողմից ստորագրված փաստաթղթով կողմերը վերահաստատել են Միջերկրածովյան խորհրդարանական վեհաժողովի եւ Հայաստանի Հանրապետության Ազգային ժողովի հանձնառությունը պահպանելու ու խորացնելու համագործակցությունը՝ նպաստելով ընդհանուր արժեքների եւ նպատակների առաջմղմանը Եվրո-Միջերկրածովյան ու Ծոցի տարածաշրջաններում, ինչպես նաեւ դրանցից դուրս:
Կարդացեք նաև
Միջոցառման ընթացքում Հակոբ Արշակյանը հանդես է եկել ելույթով «Խորհրդարանական դիվանագիտությունը՝ որպես ժողովրդավարական ինստիտուտների դիմակայունության հենասյուն» թեմայով:
ՀՀ ԱԺ փոխնախագահը նաեւ կարճ շփումներ է ունեցել տարբեր երկրների գործընկերների հետ:
Գագաթնաժողովի աշխատանքներին մասնակցել են Միջերկրածովյան խորհրդարանական վեհաժողովի անդամ եւ գործընկեր देशों խորհուրդարանների պատվիրակություններ՝ ներկայացված խորհրդարանների նախագահների, փոխնախագահների եւ բարձրաստիճան ներկայացուցիչների մակարդակով:
***
ՀՀ ԱԺ նախագահի տեղակալ Հակոբ Արշակյանի ելույթը Միջերկրածովյան խորհրդարանական վեհաժողովի անդամ եւ գործընկեր երկրների խորհրդարանների նախագահների առաջին գագաթնաժողովում
Միջերկրածովյան խորհրդարանական վեհաժողովի անդամ եւ գործընկեր երկրների խորհրդարանների նախագահների առաջին գագաթնաժողովում ՀՀ ԱԺ նախագահի տեղակալ Հակոբ Արշակյանը ելույթ է ունեցել «Խորհրդարանական դիվանագիտությունը՝ որպես ժողովրդավարական ինստիտուտների դիմակայունության հենասյուն» թեմայով:
«Մեծարգո՛ նախագահ,
Պարո՛ն գլխավոր քարտուղար,
Ձե՛րդ գերազանցություններ,
Հարգելի՛ գործընկերներ,
Տիկնա՛յք եւ պարոնա՛յք,
Ինձ համար մեծ պատիվ է այսօր ելույթ ունենալ այս կարեւոր գագաթնաժողովում:
Նախեւառաջ, ցանկանում եմ անկեղծորեն շնորհակալություն հայտնել Չեռնոգորիայի խորհրդարանին ջերմ հյուրընկալության եւ այս միջոցառումը հիանալի կազմակերպելու համար:
Հայաստանի Հանրապետության համար Միջերկրածովյան խորհրդարանական վեհաժողովին որպես դիտորդ միանալը կարեւոր քայլ է, որն արտացոլում է մեր հավատարմությունը խաղաղությանը, ժողովրդավարությանը, փոխադարձ հարգանքին, ինքնիշխանությանը եւ միջազգային համագործակցությանը:
Հայաստանն այս հարթակը դիտարկում է որպես հնարավորություն՝ խորացնելու համագործակցությունը միջազգային գործընկերների հետ, նպաստելու տարածաշրջանային կայունությանը եւ ակտիվորեն մասնակցելու մեր ավելի լայն տարածաշրջանի ապագան ձեւավորող քննարկումներին:
Վերջին տարիների ընթացքում Հայաստանն անցել է զգալի վերափոխումների միջով:
2018 թվականից ի վեր Հայաստանն իրականացրել է խոշոր ժողովրդավարական եւ ինստիտուցիոնալ բարեփոխումներ՝ ուղղված թափանցիկությանը, հաշվետվողականությանը եւ հակակոռուպցիոն քաղաքականությանը:
Այսօր Հայաստանը դասվում է աշխարհի առաջատար երկրների շարքին ժողովրդավարական զարգացման եւ մամուլի ազատության տեսանկյունից: Միջազգային կազմակերպությունները շարունակում են ճանաչել ժողովրդավարական ինստիտուտների եւ հանրային կառավարման ամրապնդման գործում արձանագրված առաջընթացը:
Միեւնույն ժամանակ, Հայաստանը ցուցաբերել է վստահ տնտեսական աճ: Վերջին տարիներին մեր երկիրը գրանցել է տնտեսական աճի ամենաբարձր տեմպերից մեկն աշխարհում: Այս տնտեսական առաջընթացը թույլ է տվել Հայաստանին խոշոր ներդրումներ կատարել ենթակառուցվածքների, կրթության, գիտության եւ տեխնոլոգիաների ոլորտներում:
Պետական ծրագրերի միջոցով ամբողջ Հայաստանում հարյուրավոր դպրոցներ եւ մանկապարտեզներ նորովի կառուցվում են կամ ամբողջությամբ վերանորոգվում: Հայաստանը նաեւ զգալի ներդրումներ է կատարում գիտության եւ նորարարության ոլորտում՝ ներառյալ արհեստական բանականության գործարանների եւ գերհամակարգչային կենտրոնների ստեղծումը՝ լրացուցիչ հաշվողական հզորություն հաղորդելով համաշխարհային տնտեսությանը:
Հայաստանն այժմ դասվում է մեկ շնչին ընկնող հաշվողական հզորությամբ աշխարհի առաջատար տասը երկրների շարքում եւ շարունակում է արագորեն աճել այս ոլորտում:
Միեւնույն ժամանակ, Հայաստանի ամենակարեւոր առաջնահերթություններից մեկը շարունակում է մնալ Հարավային Կովկասում խաղաղության գործընթացը: 2025 թվականին Հայաստանի, Ադրբեջանի եւ Ամերիկայի Միացյալ Նահանգների առաջնորդների կողմից ստորագրված համաձայնագրից հետո տարածաշրջանում տիրում է խաղաղություն: Սա պատմական ձեռքբերում է եւ կարեւոր հնարավորություն տարածաշրջանային երկարաժամկետ կայունության համար:
Մենք նաեւ կարեւորում ենք Հայաստանի եւ Ադրբեջանի խորհրդարանների ղեկավարների միջեւ շարունակական երկխոսությունը Միջխորհրդարանական միության վեհաժողովների ժամանակ, ինչը մնում է կարեւոր վստահության կառուցման եւ մեր երկրների միջեւ հարաբերությունների կարգավորմանն աջակցելու համար:
Հարգելի՛ գործընկերներ,
Միջերկրածովյան խորհրդարանական վեհաժողովը ստեղծում է կարեւոր տարածք համագործակցության, երկխոսության եւ փոխըմբռնման համար:
Հայաստանը միանում է այս վեհաժողովին պատասխանատվությամբ ու համագործակցելու պատրաստակամությամբ, եւ մենք ակնկալում ենք ակտիվորեն նպաստել խաղաղության, կայունության եւ փոխգործակցության մեր ընդհանուր ջանքերին:
Շնորհակալություն ուշադրության համար »,- նշել է ՀՀ ԱԺ նախագահի տեղակալը:
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱԶԳԱՅԻՆ ԺՈՂՈՎ
ՀԱՍԱՐԱԿԱՅՆՈՒԹՅԱՆ ՀԵՏ ԿԱՊԵՐԻ ԵՎ ՀԱՂՈՐԴԱԿՑՈՒԹՅԱՆ ՎԱՐՉՈՒԹՅՈՒՆ
