«Հանուն Հանրապետության» կուսակցությունը խստորեն դատապարտում է «Փաստերի ստուգման հարթակի» հրապարակած վերջին փաստերը, որոնք վկայում են Հայաստանի Հանրապետության դեմ Ռուսաստանի պետական համակարգի հետ առնչվող շրջանակների կողմից իրականացված համակարգված տեղեկատվական և քաղաքական ազդեցության գործողությունների մասին։
Հրապարակված նյութերը ցույց են տալիս ոչ թե առանձին քարոզչական դրվագներ, այլ Հայաստանի դեմ իրականացվող հիբրիդային պատերազմի ամբողջական գործիքակազմ՝ ապատեղեկատվություն, մեդիա մանիպուլյացիաներ, հասարակական պառակտում հրահրող արշավներ և ներքաղաքական գործընթացների վրա ազդելու փորձեր։
Սա Հայաստանի ինքնիշխանության, ժողովրդավարական ինստիտուտների և ընտրական գործընթացի դեմ ուղղված լուրջ սպառնալիք է։ Նման գործողությունները պահանջում են պետական, դիվանագիտական և անվտանգային հստակ արձագանք։
Կոչ ենք անում Հայաստանի Հանրապետության արտաքին գործերի նախարարությանը անհապաղ կանչել Հայաստանում Ռուսաստանի Դաշնության դեսպանին և պահանջել պաշտոնական պարզաբանումներ՝ հրապարակված փաստերի, դրանց հնարավոր պետական կապերի և Հայաստանի ներքին գործերին միջամտելու փորձերի վերաբերյալ։
Կարդացեք նաև
Միաժամանակ կոչ ենք անում ընտրություններին մասնակցող բոլոր քաղաքական ուժերին հստակ և հրապարակային դատապարտել Հայաստանի դեմ իրականացվող ցանկացած արտաքին միջամտություն և հիբրիդային պատերազմ՝ անկախ նրանից, թե ում քաղաքական շահերին է այն տվյալ պահին ծառայում։
Հայաստանի իշխանությունը, ընդդիմությունը և ապագան պետք է ձևավորվեն միայն Հայաստանի քաղաքացու ազատ կամքով, ոչ թե օտար պետության հիբրիդային օպերացիաներով, կեղծ լուրերով, ստվերային ցանցերով և մեր հասարակությունը ներսից պառակտելու հաշվարկված փորձերով։
«Հանուն Հանրապետության» կուսակցություն
