Հակակոռուպցիոն դատարանում դատավոր Վահե Դոլմազյանի նախագահությամբ «Ուժեղ Հայաստան» կուսակցությունների դաշինքի առաջնորդ Սամվել Կարապետյանի գործով դատական նիստում պաշտպանական կողմը միջնորդություն ներկայացրեց «Ստրոյպրոյեկտի» դրվագով Սամվել Կարապետյանին ներկայացված մեղադրանքով հետապնդումը դադարեցնելու մասին, որի էությունը հետևյալն է։
Հաշվի առնելով, որ կալանքի հարցերը քննարկելիս բոլոր ատյանների դատարանները հիմնավոր կասկածը նվազագույն շեմով փաստված չեն համարել և մերժել են, այս պայմաններում նախաքննական մարմինը, նաև հսկող դատախազը պաշտպանական կողմի կարծիքով պարտավոր է հետապնդումը դադարեցնել և մեղադրական եզրակացությունում տվյալ դրվագը չարտացոլել։
«Բայց քանի որ այս գործով քրեադատավարական նորմերը կիրառվում են կամայականորեն, նույն տրամաբանությամբ «Ստրոյպրոյեկտի» մեռած դրվագը ևս վերջնական մեղադրանքում արտացոլվել է և ընդհանուր մեղադրական եզրակացությունում երեք դրվագներով ուղարկվել է դատարան։ Ընդ որում, այս գործով այդ դրվագը երեք մեղադրյալներից վերաբերել է միայն Սամվել Կարապետյանին։
Այսինքն՝ ակնհայտ անհիմն մեղադրանք է և պետք է տվյալ դրվագով հետապնդումը դադարեցվեր։ Բայց ունենք իրողություն՝ ուղարկվել է դատարան։ Այս փուլում բարձրացրել եք հետապնդումը դադարեցնելու հարց, որի համար ապացույցների հետազոտություն չի պահանջվում՝ հաշվի առնելով արդեն իսկ իմ հիշատակած եռաստիճան դատական համակարգի կայացրած դատական ակտերը, որոնք օրինական ուժի մեջ են, որոնցով հիմնավոր կասկածը նվազագույն շեմով չի արձանագրվել։
Կարդացեք նաև
Սա պետք է որոշակի դատավարական հետևանքներ առաջացներ քննիչի և դատախազի համար, նաև՝ հետապնդումը դադարեցնելու պարտականություններ։ Բայց այս գործով քաղաքականությունն ու իրավաբանությունը զուգահեռաբար ընթանում են և ներկա դրությամբ գերիշխում է քաղաքականությունը»,-Aravot.am-ին ասաց միջնորդությունը ներկայացրած փաստաբան Արշակ Վարդանյանը։
Մյուս փաստաբանները միացան այս միջնորդությանը։ Արամ Վարդևանյանը միասնական դիրքորոշումը գրավոր կներկայացնի դատարանին։ Հաջորդ դատական նիստում դատարանն ամենայն հավանականությամբ միջնորդության շուրջ կլսի նաև հանրային մեղադրողի դիրքորոշումը և որոշում կկայացնի։
Աշոտ ՀԱԿՈԲՅԱՆ
