«Քաղաքական այն ուժերը, որոնք անցել են խորհրդարան, ում սատարել է մեր ժողովուրդը, պետք է որոշում կայացնեն, և բոլորս պետք է այդ որոշմանը ենթարկվենք ու այդ որոշումներն իրականացնենք»,- այսօր լրագրողների հետ զրույցում ասաց ՀՀ 3-րդ նախագահ Սերժ Սարգսյանը։
Հարցին՝ ինչ հնարավորություն է տեսնում այդ ուժերի համար այս փուլում, Սերժ Սարգսյանը պատասխանեց. «Շատ տարբերակներ չկան, կամ մանդատները ստանում, գնում են խորհրդարան, կամ հրաժարվում են մանդատներից: Այդ երկու ելքերի մեջ կան և՛ առավելություններ, և՛ բացասական կողմեր, բայց խնդիրը ձև ընտրելը չէ, այլ հստակ ռազմավարություն ունենալն է: Երկու ձևով էլ կարելի է հասնել հաջողության»։
Սարգսյանի խոսքով՝ փողոցը միշտ էլ օգտակար է, իսկ փողոցով հաջողության հասնելը կախված է նաև այն ուժերից, որոնք ստացել են բավականին մեծ սատարում ժողովրդի կողմից։
Կարդացեք նաև
Անդրադառնալով ընտրությունների արդյունքներին՝ Սարգսյանն ասաց. «Ե՛վ նախընտրական փուլում, ե՛ւ քվեարկության օրը տեղի են ունեցել մասսայական խախտումներ: Եթե մենք, օրինակ, 2017-ին անցկացնեինք այսպիսի ընտրություններ, ապա եվրոպական դիտորդները անպայման կֆիքսեին, որ ե՛ւ նախընտրական փուլում, ե՛ւ քվեարկության օրը ընտրություններն անցել են համատարած խախտումներով: Բայց չեմ ակնկալում, որ այդ դիտորդներն այդպիսի արձանագրություն կանեն հիմա, որովհետև նախընտրական փուլում իրենց քաղաքական ղեկավարները ամբողջական սատարում են հայտնել այսօրվա իշխանություններին, կարծում եմ՝ դա այդ մարդկանց կկաշկանդեր»։
Արփինե ՍԻՄՈՆՅԱՆ
