Թիվ 9 ընտրատարածքային ընտրական հանձնաժողովի անդամներն այսօր թիվ 9/55 տեղամասի քվեարկության արդյունքների վերահաշվարկի ժամանակ բացահայտել են արտառոց դեպք։
Ծրարում հայտնված 29 անվավեր քվեաթերթիկներից 11-ը վավեր են եղել, բայց, պարզվում է, որ տեղամասի հանձնաժողովի նախագահը գրիչով տվյալ քվեաթերթիկների ծրարների վրա գրել է անվավեր:
«Ոչ պատռված է, ոչ բան, ի՞նչ հիմքով համարենք սա անվավեր: Ի՞նչ իրավունք ուներ ձեր ձեռքին գրիչ լիներ, որ գրիչով էլ քվեաթերթիկի վրա գրել եք անվավեր: Ծրարի վրա գրառումն ի՞նչ է համարվում: Ոնց հասկանամ՝ դուք ի՞նչ եք արել, ինչո՞ւ եք նման բան արել» ,- վերահաշվարկի ժամանակ ընտրատարածքային ընտրական հանձնաժողովի նախագահը զայրացած դիմեց տեղամասի հանձնաժողովի նախագահին:
Նա զայրույթից չէր հանգստանում ու կրկին տեղամասի հանձնաժողովի նախագահին դիմելով՝ հարցրեց. «Ի՞նչ իրավունք ունեք ուրիշի ձայնը անվավեր անեք»:
Կարդացեք նաև
Ընտրատարածքային ընտրական հանձնաժողովի նախագահը 20 րոպե ընդմիջում հայտարարեց, որ հասկանա՝ ինչ լուծում տա այս խնդրին, ասաց. «Ինձ զրկել եք իրողությունը պարզելուց: Այս քվեաթերթիկի ի՞նչն եք անվավեր համարել, դա եմ ուզում հասկանալ: Նման դեպք չի եղել երբեւէ, ոչ մեկ նման բան չի արել»:
Ավելի ուշ թիվ 9 ընտրատարածքային ընտրական հանձնաժողովի անդամները քվեարկության դրեցին անվավեր համարված 11 քվեաթերթիկը ու միաձայն որոշեցին վավեր դարձնել, սակայն չհրապարակեցին՝ ում ձայներն էին դրանք:
Արփինե ՍԻՄՈՆՅԱՆ
