Երևանի «Դվին» համալիրում Ռուսաստանի օրվան նվիրված տոնակատարություններ են. մասնակցում են ՀՀ իշխող կուսակցության հիմնական ներկայացուցիչները։
Չնայած Ռուսաստանի հետ լարված հարաբերություններին` միջոցառման ներկա են ոչ միայն փոխվարչապետ Մհեր Գրիգորյանը (որն ավանդաբար մասնակցում է ընդունելությանը – խմբ.), այլև ԱԺ նախագահ Ալեն Սիմոնյանը, փոխխոսնակ Ռուբեն Ռուբինյանը, ինչպես նաև էկոնոմիկայի և ՏԿԵ նախարարներ Գևորգ Պապոյանը և Դավիթ Խուդաթյանը։
Իր ելույթում ՀՀ փոխվարչապետը նշել է, որ երկու երկրների միջև համագործակցության կուտակված փորձը երկարաժամկետ, հիմնարար և արժեքավոր ակտիվ է, որը կարևոր է պահպանել՝ անկախ միջազգային հարաբերությունների կոնֆիգուրացիայից։
«Մենք հույս ենք հայտնում, որ առկա խնդիրներն ու տարաձայնությունները հաջողությամբ կլուծվեն բաց երկխոսության միջոցով, և որ ՀՀ-ի և ՌԴ–ի միջև հարաբերությունները կշարունակեն զարգանալ փոխըմբռնման, փոխադարձ հարգանքի և բարիդրացիության ոգով՝ մեր պետությունների և ժողովուրդների բարօրության համար», – նշել է Գրիգորյանը։
Կարդացեք նաև
ՀՀ–ում ՌԴ դեսպան Սերգեյ Կոպիրկինը Ռուսաստանի օրվան նվիրված ընդունելության ժամանակ նշել է, որ ՌԴ-ն և Հայաստանը սերտ կապեր են պահպանում առաջնորդների մշտական շփումների, կառավարությունների, խորհրդարանների աշխատանքի, ինչպես նաև բազմաթիվ համատեղ համաձայնագրերի միջոցով:
«Ռուսական կողմը երբեք կասկածի տակ չի դրել և չի դնում Հայաստանի Հանրապետության ինքնիշխան արտաքին քաղաքականության անվիճելի իրավունքը: Մենք ակնկալում ենք, որ Երևանի փոխգործակցությունը այլ գործընկերների հետ չի վնասի մեր երկկողմ կապերը և ուղղված չի լինի Ռուսաստանի դեմ»,– ասել է նա։
Դիվանագետը հիշեցրել է նաև համատեղ պատմական անցյալը, առաջին հերթին՝ Երկրորդ համաշխարհային պատերազմի ժամանակ նացիզմի դեմ տարած հաղթանակը։
Կոպիրկինը նաև հայտնել է, որ մինչև տարեվերջ Մոսկվայում ՀՀ հոգևոր մշակույթի օրեր կանցկացվեն, իսկ ՀՀ–ում` ՌԴ հոգևոր մշակույթի օրեր։
«Սպուտնիկ Արմենիա»
