Եվրոպական միության Հարավային Կովկասի և Վրաստանի ճգնաժամի հարցերով հատուկ ներկայացուցիչ Մագդալենա Գրոնոն X-ի իր միկրոբլոգում գրել է.
«Ուրախ եմ կրկին լինել Բաքվում և բովանդակալից խորհրդակցություններ անցկացնել ադրբեջանցի գործընկերների, այդ թվում՝ նախագահի օգնական Հիքմեթ Հաջիևի, նախագահի հատուկ հանձնարարությունների գծով հատուկ ներկայացուցիչ Էլչին Ամիրբեկովի, ինչպես նաև արտաքին գործերի փոխնախարար Էլնուր Մամեդովի հետ։
Մեր քննարկումները նվիրված էին տարածաշրջանային գործընթացներին, Եվրոպական միության և Ադրբեջանի հարաբերություններին, տրանսպորտային-լոգիստիկ հնարավորություններին, Ադրբեջանի և Հայաստանի միջև խաղաղ գործընթացին, ինչպես նաև Ադրբեջանում և Հայաստանում Եվրոպական միության առաջիկա բարձրամակարդակ շփումների նախօրեին քննարկվելիք հարցերին։
Մենք համաձայնեցինք, որ կարևոր է պահպանել այն դրական դինամիկան, որը ստեղծվել է երկու երկրների միջև կայուն խաղաղության ճանապարհին գրանցված պատմական ձեռքբերումների շնորհիվ։ Եվրոպական միությունը կշարունակի աջակցել այս գործընթացին»:
