«Իսրայելի կառավարության կողմից Հայոց ցեղասպանության ճանաչումը մեզ համար նշանակություն չունի, քանի որ Իսրայելի հակահայ կեցվածքը մեզ շատ է ցավեցրել։ Սա հայերի համար արված քայլ չէ, Իսրայելը ի նպաստ հայերի ի՞նչ քայլ պետք է անի։ Իսրայելը Ադրբեջանի դաշնակից պետություն է»,- «Առավոտ»-ի հետ զրույցում ասաց Ստամբուլում լույս տեսնող «Ակօս» պարբերականի հայալեզու էջի խմբագիր Բագրատ Էստուկյանը՝ անդրադառնալով Իսրայելի կառավարության կողմից Հայոց ցեղասպանության ճանաչմանը։
Նրա խոսքով՝ Թուրքիայում լայն արձագանք չի գտել Իսրայելի կառավարության այս որոշումը, սա ձեւական քայլ է՝ ուղղված Թուրքիայի դեմ։ «Թուրքիա-Իսրայել հարաբերությունները լարված են Գազայի ցեղասպանության հետեւանքով։ Իսրայել պետությունը Գազայում ցեղասպանություն գործադրեց, այդ պատճառով հարաբերությունները լարված են»,- նշեց նա։
Բագրատ Էստուկյանի խոսքով՝ Հայոց ցեղասպանության հարցը փաստորեն շահարկվում է տարբեր երկրների կողմից։ «Բայց Իսրայելի կողմից ճանաչումը ոչ մեզ ուրախություն է պատճառում, ոչ էլ՝ ուրիշներին տխրություն։ Եթե Իսրայելի կառավարությունը ճանաչել է Հայոց ցեղասպանությունը, դա ի՞նչ նշանակություն ունի մեզ համար»,- ընդգծեց նա։
Ռոզա ՀՈՎՀԱՆՆԻՍՅԱՆ
