Եվրահանձնաժողովի նախագահ Ուրսուլա ֆոն դեր Լայենը հուլիսի 1-ին ժամանել է Բաքու: Նույն օրը, երբ ֆոն Դեր Լայենը ժամանել է Բաքու, որտեղից՝ ի դեպ, այցելելու է Երեւան, Հայաստանի վարչապետ Նիկոլ Փաշինյանը իր նախաձեռնությամբ կապվել է Ռուսաստանի վարչապետ Միշուստինի հետ:
Կառավարության հաղորդագրությունը չի մանրամասնում, թե հատկապես ինչ հարցեր են քննարկել Միշուստինն ու Փաշինյանը: Նշվում է, որ քննարկել են երկկողմ առեւտրատնտեսական, մշակութային կապերը: Բայց այն, որ Փաշինյանը Միշուստինին զանգահարում է ֆոն դեր Լայենի՝ Բաքու ժամանման օրն ու այնտեղից Երեւան ժամանելու նախօրեին, իրապես ուշագրավ ու հատկանշական է:
Դա թերեւս արտացոլում է այն բավականին բարդ ու բազմաշերտ եռանկյունին, որ ձեւավորված է Ռուսաստան-Հայաստան-ԵՄ տիրույթում: Ի դեպ, հատկանշական է նաեւ, որ Նիկոլ Փաշինյանը կապվում է Միշուստինի, այլ ոչ թե Պուտինի հետ, թեեւ նախընտրական շրջանում հայտարարում էր, որ ունի հունիսի երկրորդ կեսին Մոսկվայում Պուտինի հետ հանդիպելու պայմանավորվածություն: Ընդ որում, Կրեմլը չէր էլ հերքում Փաշինյանի այդ հայտարարությունները: Սակայն հանդիպում չեղավ, իսկ Փաշինյանն էլ կապվում է Միշուստինի հետ: Պուտինը մերժե՞լ է: Եթե լիներ Մոսկվայի, այսպես ասած, տոտալ մերժում, ապա հազիվ թե Միշուստինը վերցներ լսափողը՝ եթե դրան դեմ լիներ Պուտինը:
Այնպես որ, ավելի հավանական է, որ ՌԴ նախագահի օրակարգում ներկայումս բոլորովին այլ առաջնահերթություններ են ու չկա Նիկոլ Փաշինյանի եւ Հայաստանի ժամանակ: Խոսքն այն մասին է, որ վերջին երկու-երեք շաբաթներին աննախադեպ ուժգնացել են Ուկրաինայից Ղրիմին եւ ընդհուպ Մոսկվային հասցվող հարվածները, Ռուսաստանին պատճառելով լուրջ անհարմարություններ ու խնդիրներ: Իսկ դա թերեւս վկայում է ուկրաինական ուղղությամբ էսկալացիայի նոր աստիճանի մասին:
Կարդացեք նաև
Իսկ հաշվի առնելով այն, որ Ուկրաինայի հարվածները ուղղակի անհնարին կլինեին առանց եվրոպացիների թե ֆինանսական, թե տեխնոլոգիական, թե ինֆորմացիոն-հետախուզական համապարփակ աջակցության, առավել ուշագրավ է դառնում նաեւ այդ ֆոնին ֆոն դեր Լայենի այցը Բաքու, հետո՝ Երեւան:
Եվրահանձնաժողովի նախագահը թերեւս կփորձի դիվանագիտական-քաղաքական մակարդակում զարգացնել այն, ինչ ռազմական մակարդակում ավելացրել են ուկրաինական ուղղությամբ: Փաշինյանը թերեւս փորձել է Միշուստինի հետ կապով հասկանալ, թե հակազդեցության ի՞նչ պոտենցիալ կամ տրամադրվածություն ունի Մոսկվան:
ՀԱԿՈԲ ԲԱԴԱԼՅԱՆ
