Նիկոլ Փաշինյանի հայտարարությունները դատավոր Ժորա Չիչոյանին չե՞ն ճնշում։ Այս հարցով այսօր Երևանի քաղաքի առաջին ատյանի ընդհանուր իրավասության դատարանի դատավոր Ժորա Չիչոյանին դիմավորեցին լրագրողները։
«Չի ճնշում, որովհետև դա ընկալում եմ որպես քաղաքական հայտարարություն, ոչ թե հրահանգ, որ այդ գործով ցանկալի որոշում կայացնեմ»,- այսօր դատավորների ընդհանուր ժողովից առաջ լրագրողների հետ զրույցում ասաց դատավոր Ժորա Չիչոյանը։
Լրագրողի դիտարկմանը, թե երեկ Նիկոլ Փաշինյանը լրագրողներին հորդորում էր պարզել, թե դատավորներից ով ում փեսան է, և հարցին՝ «հիմա դուք ո՞ւմ փեսան եք», Չիչոյանը պատասխանեց.
«Կարևոր չէ»։
Կարդացեք նաև
Լրագրողը ճշտեց. «Բայց ձեր հայրը դատախազ է»։ Ի պատասխան՝ Չիչոյանն արձագանքեց.
«Չեմ կարծում, որ դատախազը կարող է օգնել դատավորին, որ դատավոր դառնա»։
Լրագրողի մյուս հարցին, թե երբ Փաշինյանը որակումներ է տալիս դատական համակարգին, արդյոք չի՞ հեղինակազրկում համակարգը, Չիչոյանը պատասխանեց. «Չպետք է դատական իշխանության հեղինակության բարձր կամ ցածր լինելը կապեք այդ հայտարարությունների հետ»։
Հիշեցնենք, որ այսօր նախատեսված է դատավորների ընդհանուր ժողով, որի օրակարգում դատավորների էթիկայի և կարգապահական հարցերով հանձնաժողովի երեք անդամի ընտրությունն է։
Հիշեցնենք նաև, որ հանձնաժողովը նախկինում կազմված էր վեց դատավոր և երկու ոչ դատավոր անդամից, սակայն քաղաքացիական հասարակության պահանջով ոչ դատավոր անդամների թիվն ավելացվել է երեքով՝ կազմը դարձնելով վեց դատավոր և հինգ ոչ դատավոր անդամ։
Թափուր երեք տեղի համար առաջադրվել է յոթ թեկնածու՝ դատավոր Արմինե Թումասյանը, Վճռաբեկ դատարանի աշխատակից Մելիք Մելիքյանը, իրավապաշտպան Արթուր Սաքունցը, «Իրավունքների պաշտպանություն՝ առանց սահմանների» ՀԿ ներկայացուցիչ Հասմիկ Հարությունյանը, «Թրանսփարենսի Ինթերնեշնլ հակակոռուպցիոն կենտրոն» ՀԿ ներկայացուցիչ Անուշ Մկրտչյանը, իրավաբան Լուսինե Հակոբյանը և Արտակ Մկրտչյանը։
Արփինե ՍԻՄՈՆՅԱՆ
