Վերջին տարիներին հրապարակվող պաշտոնական տվյալներն ու հանրային ուշադրության կենտրոնում հայտնված բազմաթիվ դեպքերը ցույց են տալիս, որ Հայաստանում հանցագործությունների աճի վերաբերյալ մտահոգությունները շարունակվում են։
Հանցավորության աճի պատճառները հնարավոր չէ բացատրել մեկ գործոնով։ Դրանք փոխկապակցված են և միմյանց վրա ազդող բազմաթիվ գործընթացների արդյունք են։ Սոցիալ-տնտեսական խնդիրները շարունակում են մնալ ամենակարևոր նախադրյալներից մեկը։ Գործազրկությունը, եկամուտների անհավասար բաշխվածությունը, աղքատությունը, սոցիալական շարժունակության սահմանափակ հնարավորությունները և կյանքի որակի նկատմամբ դժգոհությունը ստեղծում են այնպիսի միջավայր, որտեղ որոշ մարդիկ կարող են հանցավոր վարքագիծը դիտարկել որպես խնդիրների լուծման միջոց։ Իհարկե, աղքատությունն ինքնին չի ծնում հանցագործություն, քանի որ բազմաթիվ մարդիկ դժվար սոցիալական պայմաններում ապրելով հանդերձ՝ երբեք օրենք չեն խախտում։ Սակայն սոցիալական ծանր վիճակը, հատկապես եթե ուղեկցվում է հուսահատությամբ, անարդարության զգացողությամբ և ապագայի նկատմամբ անվստահությամբ, կարող է մեծացնել հանցավորության ռիսկերը։
Սակայն տնտեսական գործոնները չեն կարող ամբողջությամբ բացատրել այն իրավիճակները, երբ առօրյա վեճերը վերածվում են ծանր բռնությունների կամ նույնիսկ սպանությունների։ Այստեղ արդեն մեծ դեր ունեն հասարակության ներսում ձևավորված արժեքային փոփոխությունները։ Վերջին տարիներին հաճախ կարելի է նկատել փոխադարձ անհանդուրժողականության, ագրեսիվ խոսույթի, զիջելու մշակույթի թուլացման և հասարակական բևեռացման դրսևորումներ։ Երբ հասարակության մեջ տարածվում է այն մտածելակերպը, որ ցանկացած անհամաձայնություն պետք է հաղթահարվի ուժի, նվաստացման կամ հակառակորդին ամբողջությամբ ոչնչացնելու միջոցով, այդ մոտեցումը աստիճանաբար ներթափանցում է նաև առօրյա հարաբերությունների մեջ։ Արդյունքում նույնիսկ կենցաղային, ճանապարհային կամ անձնական բնույթի աննշան վեճերը կարող են արագ վերածվել անկառավարելի բախումների։
Այս ամենն արդյունք է նաև այն ատելության դոզայի, որ իշխանությունները սրսկել են հանրային ու քաղաքական դաշտում՝ 2018 թվականից հետո։ Ու դրա արդյունքում էլ քաղաքական դաշտում հանդիպում ենք ծայրահեղ անհանդուրժողականության և բացահայտ թշնամանքի դրսևորումների, իշխանության ներկայացուցիչների կողմից փողոցային բառապաշարի, ինչն էլ պրոյեկտվում է հասարակության շրջանում։ Հանրային հարաբերություններում փոխադարձ հարգանքի և իրավական մշակույթի թուլացումը կարող է վտանգավոր հետևանքներ ունենալ։ Օրենքի գերակայության գաղափարը չի սահմանափակվում միայն դատարանների կամ ոստիկանության գործունեությամբ։ Այն նախևառաջ հասարակության ներսում ձևավորված համոզմունք է, որ ցանկացած խնդիր պետք է լուծվի իրավական ճանապարհով, այլ ոչ թե անձնական հաշվեհարդարի, ուժի կամ սպառնալիքի միջոցով։ Եթե քաղաքացին սկսում է հավատալ, որ իր խնդիրները հնարավոր չէ լուծել իրավական մեխանիզմներով, կամ որ դրանք չափազանց դանդաղ ու անարդյունավետ են, ապա մեծանում է ինքնադատաստանի կամ ոչ ֆորմալ մեխանիզմների կիրառման վտանգը։ Այդպիսի պայմաններում քրեական ենթամշակույթը կարող է շարունակել պահպանել իր ազդեցությունը՝ առաջարկելով սեփական «կանոնները», որոնք հակասում են օրենքի գերակայության սկզբունքներին։
Կարդացեք նաև
Սակայն մեր իրականության մեջ իրավապահ մարմինները չափազանց մեծ ռեսուրսներ են հատկացնում քաղաքական բնույթի գործընթացներին՝ ընդդիմադիր գործիչների, ակտիվիստների կամ քաղաքական հակառակորդների նկատմամբ իրականացվող քրեական հետապնդումներին, մինչդեռ հանրային անվտանգության ապահովման և հանցագործությունների կանխարգելման ուղղությամբ ակնկալվող արդյունավետությունը բավարար չէ։ Այսպիսի ընկալումները, անկախ դրանց իրավական գնահատականից, բացասաբար են անդրադառնում իրավապահ համակարգի նկատմամբ հանրային վստահության վրա։ Իսկ վստահությունը իրավապահ համակարգի ամենակարևոր ռեսուրսներից մեկն է, որովհետև քաղաքացիները շատ ավելի պատրաստակամ են համագործակցել այն մարմինների հետ, որոնց համարում են քաղաքականապես չեզոք, պրոֆեսիոնալ և բացառապես օրենքով առաջնորդվող։ Եթե հասարակության մեջ ձևավորվում է համոզմունք, որ պետական ինստիտուտները հավասարապես չեն պաշտպանում բոլոր քաղաքացիների իրավունքները, ապա իրավական պետության նկատմամբ վստահությունը թուլանում է։
Հոդվածն ամբողջությամբ՝ «Փաստ» թերթի այսօրվա համարում։
