«Ընթացակարգեր շատ կան, մասնավորաբար՝ պաշտպանվածության, դիտորդական ընթացակարգերը, մաքուր դատական գործընթացները, որտեղ կարելի է արագացված վարույթներ կիրառել։
Ընթացակարգերը բազմաթիվ են, բայց Ադրբեջանը փակ պետություն է։ Պատկերացրեք՝ մոտավորապես Հյուսիսային Կորեա․ Ադրբեջանը թույլ չի տալիս ոչ մի փաստահավաքություն երկրի ներսում, հատկապես՝ Ղարաբաղի տարածքում։
Ըստ էության՝ այդպիսի երկրի համար արդյունավետ ընթացակարգեր չեն կարող գոյություն ունենալ։ Բայց ապագային միտված իրավական գործընթացները պետք է արվեն, որովհետև Ադրբեջանը միշտ չէ, որ մնալու է այս վիճակում»,- Aravot.am-ի փաստմանը՝ ՄԻԵԴ-ում հայ գերիների շահերի ներկայացուցիչ, իրավապաշտպան Սիրանուշ Սահակյանը Բաքվում պահվող հայ գերիների շրջանում լուրջ վնասվածքների վերաբերյալ տվյալներ ստանալու մասին էր ահազանգել, և հարցին՝ ի՞նչ միջազգային ընթացակարգեր կան, որ կարելի է այս պարագայում կիրառել, այսպես պատասխանեց միջազգային իրավունքի մասնագետ Արա Ղազարյանը։
Ըստ նրա՝ այս պարագայում ամենաարդյունավետը կարող են լինել քաղաքական բանակցությունները․ «Իսկ ՀՀ-ն քաղաքական բանակցություններ այս հարցով չի վարում, ուրիշ ոչ մի այլ երկիր այդ բանակցությունները չի վարի հայ ռազմագերիների մասով»։
Կարդացեք նաև
Մեր այն հարցին՝ Ադրբեջանը, ըստ ՄԻԵԴ որոշման, չպե՞տք է պարբերաբար հաշվետվություն ներկայացնի ԵԽ-ին Բաքվում պահվող հայ ռազմագերիների պահման պայմանների վերաբերյալ, մասնավորապես, այդպիսի հաշվետվության ներկայացում է սպասվում օգոստոսի 31-ին, Արա Ղազարյանն այսպես արձագանքեց․ «Կոնկրետ գործի շրջանակում պարբերաբար պետությունը պիտի ներկայացնի հաշվետվություն։ Ես էլ Ավանեսյանի գործով եմ զբաղվում, բայց Ադրբեջանն ամբողջական տեղեկատվություն չի տալիս։ Մենք գործ ունենք փակ երկրի հետ այն տարբերությամբ, որ այն ԵԽ անդամ է։ Բայց կա ՄԻԵԴ որոշում, որ պետք է ապահովել ռազմագերիների կապը հարազատների հետ։ Ադրբեջանը դա էլ չի անում, չի էլ ասում՝ ինչու չի անում։ Իհարկե, բոլորս հասկանում ենք պատճառը»։
Արա Ղազարյանը նշեց, որ եթե գործողություններ են արվում, ապա դրանք արվում են առանձին մասնագետների կողմից․ «Մեր պետությունը, գիտեք, այդ հարցով չի էլ սիրում զբաղվել․ մասնավոր անձանց վրա է»։
Միևնույն ժամանակ նկատեց․ «Մեր իրավապաշտպաններն ընդհանրապես այս գործերին թույլ են արձագանքում, չեմ հասկանում՝ ինչու։ Ժամանակին իրավապաշտպանները միահամուռ հայտարարություններ էին անում, եթե երկրի ներսում ինչ-որ բան էր կատարվում, հիմա վերջին անգամ ե՞րբ եք նման հայտարարություն լսել։ Այնպես որ, որևէ արդյունավետ ընթացակարգ, որ կարող է օգնել, ավտորիտար երկրի վերաբերյալ չես կարող ասել։ Բայց իրավական գործընթաց պետք է տարվի»։
Արա Ղազարյանի փաստմամբ՝ Ադրբեջանն ամեն ինչ անում է պատերազմական հանցագործությունները թաքցնելու համար, անգամ ԵԽ Խոշտանգումների կանխարգելման կոմիտեի այցելությունների ժամանակ իմիտացիաներ կարող է անել, որ ներկայացնի՝ մարդիկ առողջ վիճակում են, ասում են՝ իբր բողոքներ չունեն։
Տաթև ՀԱՐՈՒԹՅՈՒՆՅԱՆ
