«Որևէ անհաղթահարելի բան չկա, եթե կա ցանկություն։ Սկզբում խորը կասկածներ եմ ունեցել, որ ի սկզբանե չկա ցանկություն այդ գործընթացն իրականացնել։ Պատճառը նաև այս իշխանությունների կողմից ճնշումները, ահաբեկչությունն է, տարբեր մեթոդները, որ կիրառում են, որ այդ գործընթացը տեղի չունենա»,- 18 արդարների գործով դատական նիստի ընդմիջման ժամանակ լրագրողների հետ ճեպազրույցում ասաց Արցախի «Արդարություն» կուսակցության համամասնական ցուցակով Արցախի Հանրապետության 7-րդ գումարման Ազգային ժողովի պատգամավոր ընտրված Մետաքսե Հակոբյանը՝ անդրադառնալով այն իրավիճակին, որ չի ստացվում Արցախի ԱԺ նախագահ ընտրել։
Ըստ Մետաքսե Հակոբյանի՝ ՀՀ իշխանությունները կարևորում են, որ ամեն վատ բան, ինչ վերաբերում է Արցախին, արվի հենց արցախցիների ձեռքով․ «ԱԺ նոր նախագահի դեպքում այդ ճնշումները բազմապիսի են եղել։ Մենք մինչև օգոստոսի կեսեր ժամանակ ենք վերցրել, որ այս իրավիճակից դուրս գալու լուծումներ ներկայացնենք և քննարկման արդյունքում ընտրենք լավագույն տարբերակը և իրականացնենք այն։ Միանշանակ պետք է տեղի ունենա Արցախի ԱԺ նախագահի և փոխնախագահի ընտրություն։ Մենք հորդորել ենք, որ դնում ենք ամեն բան մի կողմ, կոնկրետ մեկ հարցի շուրջ ենք կենտրոնանում՝ ԱԺ նախագահի ընտրության, հետևաբար պետք է ամեն մեկը գիտակցի, որ հապաղողները, լռողները, այս իշխանություններին օգնողները դավաճանների նույն ցանկում են լինելու»։
Տաթև ՀԱՐՈՒԹՅՈՒՆՅԱՆ
