ՀԿԴ-ում դատավոր Տիգրան Դավթյանի նախագահությամբ կայացավ ՀՀ նախկին գլխավոր դատախազ, Քննչական կոմիտեի նախկին պետ Աղվան Հովսեփյանի գործով հերթական դատական նիստը։
Այսօր շարունակվեց տուժող ճանաչված Վարշամ Ղարիբյանի հարցաքննությունը։
Մեղադրանքի հետ կապված հանգամանքները՝ գույքի եւ բիզնեսի բաժնեմասերի հարցով միմյանց հետ ըստ էության թշնամացած եղբայրներին հաշտեցնելու՝ Աղվան Հովսեփյանի գործադրած ջանքերի, «Շանթ» հեռուստաընկերությունը Վարշամ Ղարիբյանի կողմից ձեռք բերելու հանգամանքները պարզելու նպատակով Աղվան Հովսեփյանի եւ նրա փաստաբանների հարցերին տուժողը երբեմն պատասխանում էր ագրեսիվ տոնով, հաճախ էլ հավասար խոսում էր նախագահող դատավորի հետ, ինչը ոչ միայն դատարանի նկատմամբ անհարգալից վերաբերմունքի դրսեւորման տարրեր էր պարունակում, այլեւ որոշակի լարվածություն էր հաղորդում նիստի ընթացքին։
Ուստի դատավորը ստիպված եղավ նրան նախազգուշացնել. «Հաջորդ անգամ, եթե ես սկսում եմ խոսել, դուք մի անգամից լռում եք»,-ասաց Տիգրան Դավթյանը։
Կարդացեք նաև
Ըստ մեղադրանքի՝ Աղվան Հովսեփյանը տարիներ շարունակ զբաղեցնելով բարձրաստիճան պետական պաշտոններ, ներգրավված է եղել ապօրինի ձեռնարկատիրական գործունեության, պաշտոնեական լիազորությունների չարաշահման, կաշառք ստանալու, ինչպես նաեւ հանցավոր ճանապարհով ստացված գույքի օրինականացման գործընթացներում։
Այսօրվա դատական նիստը հետաձգվեց։ իսկ մինչ այդ Աղվան Հովսեփյանի պաշտպանական թիմը դատարանից խնդրեց, որպեսի նախորդ նիստի ձայնագրությունը տրամադրվի իրենց, իսկ հանրային մեղադրողը նշեց, որ տուժողն իրենց տրամադրել է որոշակի փաստաթղթեր, որոնք անհրաժեշտության դեպքում կներկայացվեն դատարանին։
Հաջորդ դատական նիստի օրն ու ժամը դատարանը լրացուցիչ կհամաձայնեցնի կողմերի հետ։
Աշոտ ՀԱԿՈԲՅԱՆ
