Օրերս Բաքվում տեղի ունեցած դատական նիստի ժամանակ մերժվել է «Բիզիմ յոլ» թերթի աշխատակից Մուշվիգ Հուսեյնովի ժամկետից շուտ ազատ արձակումը՝ կապված նրա առողջական խնդիրների հետ:
Բաքվի շրջանային դատարանի դատավոր Ֆաթիմա Միրիեւան մերժել է լրագրողի հայցը: «Դատարանը սխալ որոշում կայացրեց. hամաձայն 78 հոդվածի, դատապարտյալը կարող է ազատվել պատժի մնացորդից՝ կապված ծանր առողջական վիճակի հետ: Լրագրողի մոտ հայտնաբերվել է թոքախտ, սակայն դատարանն այդ հանգամանքը հաշվի չի առել»,- «Կավկազսկի ուզել»-ի լրագրողներին ասել է դատապարտյալ լրագրողի դատապաշտպան Իսախան Աշուրովը: «Այս որոշումը մենք պատրաստ ենք բողոքարկել մինչեւ Մարդու իրավունքների եվրոպական դատարան: Ցավոք, մեկ անգամ եւս մենք ականատես եղանք լրագրողի նկատմամբ դատական համակարգի ոչ ճիշտ վերաբերմունքի»,- հավելել է պաշտպանը:
Հիշեցնենք, որ Մուշվիգ Հուսեյնովը ձերբակալվել էր 2007թ. հուլիսին՝ կաշառք վերցնելու մեղադրանքով: Բացի այդ, նրան արգելվել է ազատ արձակվելուց հետո 2 տարի զբաղվել լրագրողական գործունեությամբ:
2008թ. հունվարի 21-ին դատարանը ծանր հանցագործության մեղադրանքով Հուսեյնովին դատապարտել է 6 տարվա ազատազրկման:
