Դերասան Ազատ Գասպարյանը գերեզմանների շիրմաքարերից բրոնզե, պղնձե հուշարձանների անհետացման խնդիրն է բարձրացրել: « Ինչքան գնում եմ Կոմիտասի անվան պանթեոն, սիրտս ճմլվում է, երբ նայում եմ Վահրամ Փափազյանի շիրմի վրա եղած հուշարձանին` պղնձե շեփոր նվագող տղային բազուկներից կտրել, շեփորն էլ հետը տարել են», – այսօր «Հայելի» ակումբում ասաց դերասանը: Նրա խոսքերով, մեկ տարի շարունակ Ոստիկանություն է դիմել, ահազանգել Լեւոն Ներսիսյանի ` Արա Շիրազի քանդակի անհետացման մասին. «Ոչինչ չարեցին, Արա Շիրազը նորից քանդակեց, դրեց: Այվազովսկու պղնձե վրձինը տարել են, Լեւոն Ալիշանինը` կտրեցին-տարան: Սրանք հուշարձանները, բայց այդ ինչպես է լինում, որ քաղաքի կոյուղիների վրայի կափարիչները տանում են, ամեն օր այդ բանը կատարվում է, ով պետք է բռնի դրանց ձեռքը»: Դերասանի համոզմամբ, հուշարձանների գողությանը վերջ կդրվի, եթե փակվեն գունավոր մետաղների ընդունման կետերը. «Մեր Հայաստանում, որ մի բան ասում ես, ասում են` վայիս մարդ է `հացին հարամում է, կերեք ձեր հացը, աշխատանք գտեք, բայց այդ գումարը պետբյուջե՞ է գնում, ովքեր են այդ կետերի տերերը»: Դերասան Տիգրան Ներսիսյանն էլ խոսեց վաստակավոր արտիստների գերեզմանների վտանգման մասին: «Այն երախտավորները, որոնք չունեն հարազատնմեր, նրանց գերեզմանները անմխիթար վիճակում են»: Պարոն Գասպարյանն էլ ամեն անգամ քաղաքային գերեզմանոց այցելելիս իրեն վայրի տարածքում է զգում:
Արփինե ՍԻՄՈՆՅԱՆ
