Վերջերս Պուշկինի անվան դպրոցից հեռացված շախմատի ուսուցիչ Նարեկ Վարազդատյանի հայցի հիման վրա, այսօր աշխատանքի պետական տեսչությունում քննվեց ուսուցչի հայցադիմումը:
Aravot.am-ի հետ զրույցում ուսուցիչը վստահեցրեց, որ ինքը տեսչությանն էր ներկայացրել այնպիսի հիմնավորումներ եւ փաստարկներ, ըստ որի հայցը ամբողջությամբ պիտի բավարարվի հօգուտ իրեն:
Ուսուցչի պատմելով` տնօրենը, որը ներկա էր իր իրավաբանի ու հաշվապահի հետ, մոտ 2 ժամ տեւած վարչական նիստի ընթացքում ասաց, որ աշխատանքային պայմանագիր եղել է, բայց Նարեկը չի ներկայացել, որ ստորագրի. «Ես էլ ասացի, որ եթե հրամանով եք ինձ աշխատանքի ընդունել, այդ դեպքում ինչո՞ւ հրամանը ինձ չեք ծանուցել: Շատ բաներ կային, որ իր դեմ էր, նույնիսկ ինձ աշխատանքից ազատելու համար նախ պետք է ինձանից գրավոր բացատրություն վերցներ` թե ինչո՞ւ եմ աշխատանքից բացակայում. առանց դրա ինքը ինձ ազատել է աշխատանքից: Նույնիսկ իմ տեղեկատվության հարցումը, իր նամակի պատասխանը ես ամբողջությամբ ներկայացրեցի, ինձ աշխատանքի ընդունման իր հրամանի մեջ տնօրենը գրել էր` կազմել աշխատանքային պայմանագիր, բայց պայմանագիր չէր կազմվել: Տնօրենն ընդունեց իր սխալը, ասաց` այո չեմ կազմել: Հրամանի մեջ նույնիսկ նշված չէր իմ աշխատավարձի չափը, որը եւս խախտում է, մի խոսքով բազմաթիվ կոպիտ խախտումներ ներկայացվեցին»:
Տեսչությունից Նարեկ Վարազդատյանին վստահեցրել են, որ 3-4 օրվա ընթացքում վերջնական պատասխան կտրամադրեն: Շախմատի ուսուցիչն իր հայցադիմումում պահանջել էր վարչական պատասխանատվության ենթարկել տնօրենին՝ օրենքը խախտելու համար. «Ըստ նիստում ներկայացված հիմնավորումների ու գործընթացի, կարծում եմ տնօրենը կտուգանվի իր աշխատավարձի հիսնապատիկի չափով»:
Կարդացեք նաև
Հիշեցնենք, որ Նարեկ Վարազդատյանին աշխատանքից հեռացրել են, ըստ Նարեկի՝ քաղաքական հայացքների համար եւ դպրոցում 17 աշակերտների, որոնց մեջ էին նաեւ ՀՀ նախագահ Սերժ Սարգսյանի եւ ԱԺ նախագահ Հովիկ Աբրահամյանի թոռները, 2 նշանակելու համար: Իսկ աշխատանքի պետական տեսչություն ուսուցիչը դիմել էր իրեն առանց աշխատանքային պայմանագրի աշխատեցնելու համար:
Նելլի ԲԱԲԱՅԱՆ
