Այսօր Գյումրու Հովհաննես Թումանյանի անվան թիվ 3-րդ ավագ դպրոցում, որտեղ մինչև 8-րդ դասարան սովորել էր Թալիշում նահատակված 19-ամյա Վիկտոր Յուզիխովիչը, բացեցին հերոսի անունը կրող դասասենյակ: Նրա լուսանկարների վերևում փակցված էր. «Ինձ բացակա չդնեք»:
Մերօրյա հերոսի անվան դասասենյակը բացվեց ազգային հերոս Թաթուլ Կրպեյանի անվան դասարանի կողքին: «Սիրելի ընկեր՝ այսօր դու մեզ հետ չես, մեր կողքի՛ն չես, բայց մեր մեջ ես… դարձել ես մեր հոգու մի մասնիկը, դու եւ բոլոր նրանք ովքեր հերոսաբար կարողացան իրենց վերջին ճիգը գործադրել ու հանունի համար ընկան Հայրենիքի վաղվա լուսավոր օրը նկարելու այդ վեհ գործի ժամանակ, թույլ չտալով թշնամուն սողոսկելու երկրիդ ներսը… »,-դպրոցում այս խոսքերով փառաբանեցին հերոսին:
Հիշեցնենք , որ Վիկտորի հայրը Մոլդովայում ծնված ուկրաինացի է, սակայն մոր՝ Աննա Յուզիխովիչի ասելով, Վիկտորը վիրավորվում էր, եթե իրեն չասեին հայ ես: Վիկտորը մեծ հաջողություններ ուներ բռնցքամարտում, նա հասցրել էր դառնալ Եվրոպայի դեռահասների փոխչեմպիոն: Ու չնայած մարզիչը համոզել էր չգնալ բանակ ու շարունակել բռնցքամարտով պարապելը, Վիկտորն առարկել էր՝ ասելով. «էլ ինչ տղամարդ, որ բանակ չգնա»: Նա, վիրավոր լինելով, անզիջում կռիվ է մղել թշնամու դեմ, ազատագրել Թալիշը:
Նունե ԱՐԵՎՇԱՏՅԱՆ
