Լրահոս
Օրվա լրահոսը

Նիկոլ Փաշինյան. «Գլխավոր դատախազը չի պատրաստվում Քոչարյանին կանչել հարցաքննության, մենք գլխավոր դատախազին կկանչենք հարցաքննության»

Մարտ 16,2018 21:48

Ինչպես արդեն տեղեկացրել ենք, այսօր, Ազատության հրապարակում ի հիշատակ «Հաց բերողի» կազմակերպված հանրահավաքին, իբրեւ քաղաքացի, մասնակցում էր նաեւ «Ելք» խմբակցության պատգամավոր Նիկոլ Փաշինյանը: «Կասկած չկա, որ Արթուր Սարգսյանի մահն իշխանության գործողությունների հետեւանք է: Մենք դիմել էինք, փաստորեն շատ ուշ արձագանքեցին եւ պարզվեց, որ Արթուր Սարգսյանի առողջությունն այնքան քայքայված է, որ հնարավոր չէ վերականգնել»,- լրագրողների հետ զրույցում ասաց Նիկոլ Փաշինյանը:

Լրագրողները հետաքրքվեցին Նիկոլ Փաշինյանի`2008 թվականի «մարտի 1»-ի գործով ՀՀ երկրորդ նախագահ Ռոբերտ Քոչարյանին հարցաքնելու իր դիմումով: Դատախազությունից պատասխանել էին, որ Նիկոլ Փաշինյանը «ՀՀ հատուկ քննչական ծառայությունում քննվող քրեական գործերով քրեական դատավարության մասնակցի կարգավիճակ չունի»  եւ չի կարող նման հարցով դիմել: «Գլխավոր դատախազը չի պատրաստվում Քոչարյանին կանչել հարցաքննության, մենք գլխավոր դատախազին կկանչենք հարցաքննության»,- ասաց Նիկոլ Փաշինյանը:

Լրագրողները հիշեցրին` Ռոբերտ Քոչարյանի խոսնակն ասել էր՝ սադրողը Նիկոլ Փաշինյանն է եղել: «Դա 2008-ի հարուցված քրեական գործով պաշտոնական վարկածն է: Այդ մասին նոր չէ, որ պիտի կարծիք հայտնեմ»,- եղավ Նիկոլ Փաշինյանի պատասխանը:

Խոսելով «Ելք»-ում ընթացող քննարկումների՝ «Քաղաքացիական պայմանագրի» եւ «Լուսավոր Հայաստանի» միջեւ առկա տարաձայնությունների մասին էլ Նիկոլ Փաշինյան ասաց. «Չեմ պատրաստվում թեւերս ծալած հետեւել Սերժ Սարգսյանի երրորդ պաշտոնավարմանը»:

Լրագրողները հիշեցրին`դեռ 2014-ին Էդմոն Մարուքյանը հայտարարել էր, որ չի պահանջելու Սերժ Սարգսյանի հրաժարականը: «Էդմոն Մարուքյանը հայտարարել է, որ պատրաստ է ստորագրել Սերժ Սարգսյանի իմպիչմենտի համար»,- պատասխանեց Նիկոլ Փաշինյանը:

«Որեւէ մեկը հիմք չունի ասելու, որ այդ հարցում ընդհանուր հայտարար չկա: Տարաձայնություններ կան, եղել են, քննարկում ենք: Մենք ունենք 14+4 օրվա գործողությունների ծրագիր: Եթե անգամ մեկ շաբաթ առաջ համաձայնության եկած լինեինք, միեւնույն է, մեր գործողությունները սկսվելու էին ամսվա վերջից»,- ասաց Նիկոլ Փաշինյանը՝ հավելով, որ «Հանուն Հայաստան պետության» ճակատի հետ էլ են համատեղ պայքարի քննարկումներ ընթանում. «Մենք ունենք մեր ճանապարհային քարտեզը, մնացածը հընթացս կերեւա»:

Իրենց համար նախապայմանը խաղաղ պայքարն է:

Նելլի ԳՐԻԳՈՐՅԱՆ

Հ. Գ. Հարցազրույցը կայացել է մինչեւ Դավիթ Սանասարյանի կոչը:

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Մարտ 2018
Երկ Երե Չոր Հնգ Ուրբ Շաբ Կիր
« Փետ   Ապր »
 1234
567891011
12131415161718
19202122232425
262728293031