Հանրապետության բարձր ու միջին պաշտոնատար անձանց թանկագին մասունքի պես նվերներ են բաժանում։ Նվիրողը հանրապետության կառավարությունն է։ Մասունք-նվերը այս գիրքն է։ Հանրապետության վարչապետ Արմեն Դարբինյանը «ուզուրպացրել» է կառավարության գործունեության ծրագրի հեղինակային իրավունքը եւ գրքույկի տեսքով հրապարակել այն։ Շքեղ հրատարակություն է՝ բառի ամենաուղիղ իմաստով, բարձր ու գունավոր տպագրությամբ, մալապատ թղթով։ Տպագրվել է կառավարության տնտեսական բարեփոխումների վերլուծական կենտրոնի կողմից՝ «Առերեսում» տպարանում։ Հրատարակչական տվյալների մեջ նշված չէ տիրաժը։ Սակայն ոչ ոք չի կասկածում, որ այն արժանի է այն նույն տպաքանակին, որով լույս էին տեսնում Լեոնիդ Իլյիչ Բրեժնեւի «Մալայա զեմլյա» գեղարվեստական երկը կամ «Լենինյան կուրսով» բազմահատոր աշխատությունը։
Հետաքրքիր է, կառավարությունը երբեւէ կհրապարակի՝ թե որքան գումար է ծախսվել այս նպատակով եւ որտեղից այդ գումարները։ Տրամաբանորեն այն կարող էր տպագրվել ինչ-որ անհայտ բարերարի հովանավորությամբ կամ պետական բյուջեի հաշվին։ Տպագրական գործի արհեստավարժների գնահատմամբ, այս գրքույկի ինքնարժեքը 1000 օրինակ տպաքանակի դեպքում կազմում է 6-8 դոլար, 2000-ի դեպքում՝ 4-6 դոլար։ Այս հաշվարկները կատարելիս փորձագետները ենթադրում են, որ գրքույկի հեղինակը հոնորար չի ստացել։ Իսկ եթե հեղինակը չուբայսական 45 հազար դոլարանոց հոնորար է ստացել, գրքույկի արժեքը կարելի է որոշել հին, պապենական մեթոդով։ Պարզապես պետք է վերցնել լծակավոր կշեռք. մի նժարին դնել գրքույկի օրինակը, իսկ մյուսին՝ ոսկեդրամներ, մինչեւ կշեռքը հավասարակշռվի։ Ցավոք, նույն մեթոդով հնարավոր չէ որոշել գրքույկի պատմական արժեքը։
Ա. Գ.
