Սառնասրտորեն խոսելով էլեկտրաէներգիայի սակագնի բարձրացման մասին, ֆինանսների եւ էկոնոմիկայի նախարար Էդվարդ Սանդոյանն անեկդոտի սիրտ էլ ուներ։ Ասեմ, որ նախարարը խոստացավ «Առավոտին» տված յուրաքանչյուր հարցազրույց եզրափակել անեկդոտով։ Միայն խնդրեցի, որ հարցազրույցի եւ անեկդոտի թեմատիկաները մոտ լինեն։ Եվ այսպես. «Կոմունիստների ժամանակ, հիշո՞ւմ եք, տալոնային սիստեմ էր։ Ու, ո՞նց ասեմ, որ հասկանալի լինի, ամուսինների միջեւ, է՜ննն… դե, ինտիմ հարաբերություններն էլ էին տալոնով։ Նու, ամեն մարդ գալիս էր, ԺԷԿ-ից տալոն ստանում։ Ստանալուց առաջ էլ անպայման պիտի հիմնավորեր՝ քանի՞ տալոն է ուզում… Հաշվի էին առնվում նաեւ տարիքային առանձնահատկությունները։
Մի մարդ միշտ ժամանակին ստանում ու սպառում ա իր տալոնները։ Մի անգամ էլ տուն ա գալիս, տեսնում, որ տալոնը կորցրել ա։ Կնոջը թե՝ ի՞նչ կլինի, այս անգամ թող, մյուս ամսվա տալոնի հաշվին։ Կինը չի համաձայանում. «Տալոնը պիտի տանեմ ԺԷԿ, հաշվառման անցնեմ։ Բեր դու հարեւան Սերոժ պապից վերցրու իրա տալոնը, մեկ ա, իրան պետք չի»։ Գալիս են Սերոժ պապի մոտ։ -Սերո՛ժ պապի (սա էլ հազիվ է լսում), է՜ն տալոնը տուր մեզ, է՛լի, մեկ ա, քեզ պետք չի։ -Տա՜մ, բալա ջա՜ն, բայց իմը ճակատը պաչելու ա»։
… Պրն Սանդոյանը լռեց՝ ի վերջո կտրոնը Սերոժ պապից ամուսնական զույգը վերցրե՞ց, թե ոչ։ … Իմ կողմից ավելացնեմ, որ վատ չէր լինի, եթե Սերոժ պապը հաջորդ ամիսների իր կտրոնները խնամքով պահեր մինչեւ մեր օրերը եւ հանձներ մեր կառավարությունը սիրողներին։
Լ. Ա.
