Չնայած, ՀՀ արդարադատության նախարար Դավիթ Հարությունյանի նախորդ օրը պաշտոնապես արված այն հայտարարությանը, թե հունական OTE ընկերության հետ պայմանագիր կնքելիս ՀՀ-ն ամրագրել է բավարար պաշտպանական մեխանիզմներ՝ այդուհանդերձ, հունական նույն թերթը դարձյալ համառորեն պնդում է, թե OTE-ն ցանկանում է «ԱրմենՏելի» իր բաժնեմասը օտարել թուրքական ընկերություններին։
Այս հարցը պարզաբանելու համար դիմեցինք նախարար Դավիթ Հարությունյանին։ «Պաշտոնապես մեր դեսպանատունը եւս OTE-ից ստացել է, որ այդ տեղեկատվությունը չի համապատասխանում իրականությանը։ Բայց եթե անգամ OTE-ն բանակցություններ վարում է՝ ես որեւէ ձեւով մտահոգված չեմ, քանի որ պայմանագրում կա կետ, որով արգելվում է իրավունքների եւ պարտականությունների փոխանցումը։ Այսինքն, գնորդը չի կարողանա այդ պարտականությունները փոխանցել, հակառակ պարագայում, արդեն մենք շատ հստակ պաշտպանության մեխանիզմներ ունենք՝ այդ թվում նաեւ դատական»,- հայտարարեց պրն Հարությունյանը։
OTE-ի ներդրումային պարտավորությունների առնչությամբ Դավիթ Հարությունյանը տեղեկացրեց, որ ներդրումների հերթական ժամկետը լրացել է մարտի 3-ին եւ այդ օրը «ԱրմենՏելը» հայտարարել է, որ OTE-ն կատարել է 102 մլն դոլարի պարտավորությունները։ «Կա Բաժնետերերի վերահսկիչ հանձնաժողով, որը ուսումնասիրում է դա, բայց միաժամանակ որպես բաժնետեր՝ մենք իրավասու ենք նաեւ ներգրավելու աուդիտորական կազմակերպություններ, եւ չի բացառվում, որ այդ հնարավորությունից մենք օգտվենք»,- շեշտեց արդարադատության նախարարը։
Լ. Մ.
