Մեկ տարի առաջ կյանքից հեռացավ հայ օպերային արվեստի ականավոր գործիչ Ավագ Պետրոսյանը։ Մարդ, որն իր բազմամյա ստեղծագործական ճանապարհին ստեղծել է օպերային կերպարների անզուգական մի շարք։ Կարելի է հերթով թվարկել նրա դերերգերը՝ Սանթուր («Դավիթ Բեկ»), Աշուղ եւ Շեյխ («Ալմաստ»), Տիրիթ («Արշակ Երկրորդ»), Ռադամես («Աիդա») եւ այլն։ Սակայն երաժշտասեր հասարակայնությունը Ավագ Պետրոսյանին հիշում է որպես Սարո։ Այդ կերպարը Ա. Պետրոսյանի կերտած գլուխգործոցն էր։
Նա Սարո է երգել 18 Անուշների հետ՝ Հայկանուշ Դանիելյան, Գոհար Գասպարյան, Էլվիրա Ուզունյան, Էլլադա Չախոյան, Ռեբեկա Օջախյան… Անուշները փոխվում էին, անվանիներին փոխարինում էին օպերային արվեստում նոր խոսք ասողները, իսկ Սարոն մնում էր անկրկնելին՝ Ավագ Պետրոսյանը։ Սարոյի դերերգը Ա. Պետրոսյանը կատարել է ավելի քան 600 անգամ եւ ամեն անգամ հանդիսատեսն ապշել է կերպարի եւ կերպավորողի միաձուլումից։ Ա. Պետրոսյանը, սակայն, միայն օպերայով չի սահմանափակվել։ Նրա կատարմամբ Կոմիտասի, Ռ. Մելիքյանի, Գ. Եղիազարյանի, Ա. Սաթյանի, հայ ժողովրդական երգերի մշակումներն առանձնացել են հուզականությամբ։
Մ. Բ.
