ՆՈՐ ՀԻՄՆԱԴՐԱՄ Մշակութային ժառանգության վերականգնման հիմնադրամը ստեղծվել է Զարգացման միջազգային գործակալության եւ ՀՀ կառավարության համաձայնագրով։ ՄԶԳ-ն մշակութային ժառանգությանն ուղղված նախաձեռնության համար տրամադրել է IDF դրամաշնորհ։ Դրամաշնորհի կառավարումը հանձնարարվել է «Հայաստան» համահայկական հիմնադրամին, իսկ վերահսկողությունը՝ ՀՀ մշակույթի, երիտասարդության հարցերի եւ սպորտի նախարարությանը։ Մշակութային ժառանգության վերականգնման հիմնադրամը նպատակ ունի բարելավել մշակութային հաստատությունների կարողություններն ու կառավարումը՝ դրանց գործունեության արդյունավետությունը ավելի բարձրացնելու միտումով, աջակցել Հայաստանի մշակութային ժառանգության պահպանմանը, օժանդակել հայ մշակութային ժառանգության ներկայացմանը՝ Հայաստանում եւ արտերկրում։ Հիմնադրամի առաքելությունը ՀՀ մշակույթի եւ մշակութային ժառանգության հրատապ լուծում պահանջող խնդիրների բավարարմանն օժանդակելն է եւ այդ նպատակով՝ ազգային մշակութային հաստատություններին անմիջական օգնություն տրամադրելը։ Հիմնադրամը դրամաշնորհներ կտրամադրի պետական, պետության մասնակցությամբ ստեղծված, ոչ կառավարական, մասնավոր կամ շահույթ չհետապնդող կազմակերպություններին, որոնք իրենց կենսունակությամբ ապահովում են բարձր պահանջարկ։ Հիմնադրամն առայժմ օժանդակություն չի տրամադրում անհատ արվեստագետներին եւ կատարողական արվեստի ճյուղերին։ «Հայաստան» համահայկական հիմնադրամ
