ԼԱՎ ԵՆ ԱՆՈՒՄ Ինձ պարբերաբար (սովորաբար երկուշաբթի օրերը) ընթերցողներ են զանգում եւ պատմում, թե ինչ է կիրակնօրյա «Հայլուրը» մեջբերում «Առավոտից»: Ճիշտն ասած, այդ հաղորդումը չեմ նայում, որովհետեւ քարոզչությունը (որեւէ մեկի կողմ կամ դեմ) ինձ բացարձակապես չի հետաքրքրում: Բայց ինձ ասում են, որ «Հայլուրը» «Առավոտից» վերցնում է միայն Քոչարյանին ձեռնտու արտահայտություններ եւ շրջանցում ոչ ձեռնտուները: Լավ են անում՝ ազատ երկիր չե՞նք: Կրկնեմ, որ մեր գործը ընթերցողին տեղեկատվություն տրամադրելն է՝ մնացածը (մեկին՝ ճիշտ, մյուսին՝ սխալ հանելը) թողնում ենք գործընկերներին: Օրինակ, եթե մենք գրում ենք՝ «Կոտայք»-«Դինամո-Զենիթ» հանդիպումն ավարտվեց ոչ ոքի՝ 1:1», ապա շատ բնական է, որ «Կոտայքի» երկրպագուները դա մեջբերելու են հետեւյալ կերպ՝ «ըստ «Առավոտի», «Կոտայքը» գոլ խփեց «Դինամո-Զենիթի» դարպասը»: Այնպես որ, «Հայլուրի» հարցով խնդրում եմ ինձ չզանգել:Իսկ, ընդհանրապես, ես հավանում եմ «Հ1»-ի մի շարք հաղորդումներ: Օրինակ, Իսպանիայի ֆուտբոլի առաջնությունը: Այ, այստեղ իսկապես հուզիչ իրադարձություններ են: ԱՐԱՄ ԱԲՐԱՀԱՄՅԱՆ
