ՆՈՐ ԱՌԵՎԱՆԳՈՒՄՆԵՐ Ընդդիմության համատեղ հանրահավաքում շաբաթ եւ կիրակի օրերին ցուցարարների նկատմամբ ոտնձգությունների նոր մեթոդներ ի հայտ եկան:8217 Դեռ ուրբաթ օրը տեղեկություններ կային, որ ոստիկանները առեւանգում են հանրահավաքի մասնակցող քաղաքացիներին: Շաբաթ եւ կիրակի եւս նման դեպքեր էին արձանագրվել: Միայն կիրակի օրը նստացույցից ոստիկաններն առեւանգել էին 5-6 հոգու, դա այնքան արագ էր կատարվել, որ ցույցի նախաձեռնողներն ու դրա մասնակցիները չէին հասցրել նույնիսկ միջամտել: Շաբաթ օրը ոստիկանները փորձել են բերման ենթարկել մի քաղաքացու, որն ավելի վաղ վրաերթի է ենթարկված եղել եւ կողոսկրերի ջարդվածքները դեռ ապաքինված չեն եղել: Ոստիկաններն այնքան ուժեղ են գրկել ու սեղմել նրան, որ արդյունքում ցուցարարն ուշաթափվել է: Իրավապահներն էլ վախեցել են ու նրան հասցրել Պռոշյան փողոցի վրա գտնվող հիվանդանոց՝ բժիշկներին ահաբեկելով դրա մասին որեւէ տեղ չխոսել: Շաբաթ օրը Էրեբունու ոստիկանական բաժին բերման էր ենթարկվել նաեւ «Հանրապետություն» կուսակցության համակիրներից մեկը՝ Անի Խաչատրյանը, որը բարձրախոսով հայտարարել էր անցկացվող հանրահավաքի մասին: Կիրակի ցերեկը ոստիկանները ֆիզիկական ուժի կիրառմամբ հենց նստացույցից առեւանգել են «Հանրապետության» քաղխորհրդի անդամ Արամազդ Զաքարյանին: Երեկ ոստիկանական բաժիններ են տարվել ՀՀ ԱԺ պատգամավորներ Թաթուլ Մանասերյանն ու Վարդան Մկրտչյանը, նաեւ «Հանրապետություն» կուսակցությունից Տիգրան անունով մի երիտասարդի եւ ՀԺԿ-ից Արուսյակ անունով մեկին: Թ. Մանասերյանն ավելի ուշ ազատ էր արձակվել: Առավոտյան ոստիկանները Էրեբունու ոստիկանական բաժին բերման են ենթարկել «Հանրապետության» անդամներ Գարեգին Բաղդասարյանին եւ Սամվել Սմբուլյանին: Եվս 30 հոգու, ովքեր ոստքով ճանապարհ են ընկել Երեւան գալու համար հենց ճանապարհին ձերբակալել են Արարատի մարզում: Ն. Մ.
